Aıtalyq, Prezıdent jańa Salyq kodeksiniń sapaly ázirlenýi úshin onyń qabyldaý merzimin kelesi jylǵa deıin uzartty. Álbette, bul máselede qoǵamnyń, onyń ishinde isker ortanyń tilegi men bıýdjettiń erekshelikteri eskerilip, salmaqty ári baıypty sheshim qabyldanýy qajet.
Jasyratyny joq, osy zańdy daıyndaý barysynda salyq rejimderi jaıly kóp suraq týandady. Qazir arnaıy salyq rejimi aıasynda 2 mln-ǵa jýyq kásipker jumys istep jatyr. Ońtaılandyrylǵan deklorasııany 1 mln 900 myńdaı adam tańdaǵan. Al bólshek salyq júıesi arqyly 30 myńdaı adam óz kásibin ilgeriletip keledi. Árıne bul rejimderdiń paıdasy bar. Biraq osy arqyly salyq tóleýden jaltaryp júrgender de kezdesedi. Mysaly, keıbir iri kompanııalar ózderiniń mańaıyna júzdegen jeke kásipkerdi shoǵyrlandyryp, osylaısha shyǵystaryn arttyrýmen birge salyq mindettemesin azaıtýdyń amalyn qarastyryp júr.
Memleket basshysynyń Joldaýynda aıtylǵandaı, arnaıy salyq rejimderi jeke tulǵalarǵa arnalyp, baǵyttalýy tıis. Sol sebepti atalǵan zańdy qaıta qarastyryp, pysyqtaıtyn bolamyz. Bizdiń maqsatymyz – salyq túsimderin ulǵaıtý, sol arqyly ekonomıkalyq ósimge jol ashý.
Budan bólek Joldaýda qaryzdary bar kásipkerlerdiń shottaryn birden buǵattamaý jóninde de aıtyldy. Ras, qazir qaryz mólsheri 6 AEK-ten asatyn bolsa, onda esepshot buǵattalady. Prezıdenttiń tapsyrmasyna sáıkes bul talap, shekti qoıý mólsheri qaıta qaralatyn bolady. Aıtalyq, bereshek deńgeıi 20-25 AEK-ten asyp jatsa da biz onyń shotyn buǵattamaı tek qana habarlama jiberý arqyly baqylaý júrgizý tetigin engizýdi kózdep otyrmyz. Áıtse de jiberilgen habarlamalar men tıisti eskertýler elenbeı, qaryz mólsheri ulǵaıa berse, sonda ǵana naqty sharalar qabyldanatyn bolady. Tutastaı alǵanda, baqylaý júıesinen birte-birte arylyp, servıstik qyzmetterge basymdyq berýdi josparlap otyrmyz.
Erjan BIRJANOV,
QR Qarjy vıse-mınıstri
