Sýretti túsirgen – Erlan OMAR, «EQ»
Jalpy, Eýrazııa ulttyq ýnıversıtetinde praktık mamandardy oqytýshylyq qyzmetke shaqyrý tájirıbesi burynnan bar. Bilim ordasy men eńbek ujymdary, jumys berýshi mekemeler arasyndaǵy ýaǵdalastyq negizinde stýdentterdiń óndiristik tájirıbeden ótýi de júıeli jolǵa qoıylǵan. Redaksııada jumys úderisimen tanysa otyryp, bilikti mamandardyń dárisin tyńdap, tájirıbelik sabaqtan tálim alýy – bolashaq jas jýrnalısterge taptyrmas azyq.
Jýrnalıstıka jáne áleýmettik ǵylymdar fakýltetiniń dekany Qaırat Saq ulttyq ýnıversıtet pen elimizdegi iri medıaqurylym arasyndaǵy áriptestik baılanys sapaly maman daıarlaýǵa yqpal etetinin aıtady.
«Fakýltet stýdentteriniń tájirıbelik sabaǵyn gazet redaksııasynda ótkizýge qoldaý kórsetken «Qazaq gazetteri» JShS basshylyǵyna alǵys bildiremiz. Stýdentterimiz úshin 105 jyldyq tarıhy bar basylymnyń redaksııasynda tájirıbeden ótip, tálim alýy – zor bedel, umytylmas mektep», deıdi Q.Saq.
Redaksııadaǵy tájirıbelik sabaqtardy júrgizgen bas redaktordyń orynbasary, praktık-aǵa oqytýshy Qýat Áýesbaıdyń aıtýynsha, bıylǵy oqý semestrinde «Egemen» redaksııasynda 1-kýrs stýdentterine «Jýrnalıstıkaǵa kirispe», 4-kýrs stýdentterine «Medıadaǵy menedjment pen marketıng» pánderi boıynsha tájirıbelik sabaqtar ótti.
«Júz estigennen bir kórgen artyq» degen qaǵıdaǵa salsaq, bolashaq jýrnalısterdiń tájirıbelik sabaqtaryn sóz zergerleriniń quthanasynda ótkizýdiń tıimdiligi kóp. Qansha jerden mýltımedıalyq jýrnalıstıka zamany desek te, jýrnalıstiń eń birinshi mindeti – saýatty jazý. Sondyqtan redaksııada ótken dáriste eń aldymen stýdentterdiń jazý qabiletin, synı oılaý, saraptaı bilý daǵdysyn shyńdaýǵa tyrystyq», deıdi Q.Áýesbaı.
«Jýrnalıstıkaǵa kirispe» páni – bizge, 1-kýrs stýdentterine qyzyqty ári áserli sabaqtardyń biri boldy. Jýrnalıstıka álemine alǵashqy qadamymyzdy nyq basyp, onyń qyr-syryna tereń boıladyq. Sabaqtyń ereksheligi «Egemen Qazaqstan» gazetiniń redaksııasynda ótýi edi. Redaksııada tájirıbe jınap, shynaıy jýrnalıstıkanyń aýrasyn sezindik. Onyń áseri erekshe boldy. Teorııalyq bilimdi tájirıbemen ushtastyrý biz úshin keremet múmkindik syılady. Oıyńdy ashyq jetkize alatyn erkin orta jáne jańasha ıdeıalardyń týyndaýyna yqpal etetin jaıly atmosfera – osynyń bári sabaqtyń qundylyǵyn arttyra tústi. Osyndaı múmkindik jasaǵan L.N.Gýmılev atyndaǵy Eýrazııa ulttyq ýnıversıteti men Dıhan Qamzabekuly bastaǵan medıaqurylym ujymyna alǵysymyz sheksiz», deıdi 1-kýrs stýdenti Eldara Saǵadıqyzy.
«Ǵasyrlyq tarıhy bar basylymda, jýrnalıstıkanyń qara shańyraǵynda bilim alǵan bir semestrde oıǵa toqyp, sanaǵa túıgenimiz az emes. Gazettegi marketıng men menedjmentten bastap, basylym men oqyrman baılanysyna qatysty suraqtarǵa jaýap aldyq. AQSh, Ulybrıtanııa, Túrkııa syndy elderdiń baspa tarıhy men elimizdiń gazetterin salystyra taldap, jańashyldyqty baǵamdadyq. Gazet jumysyn uıymdastyrý erekshelikteri, redaksııalyq saıasat, medıadaǵy zamanaýı trendter, konvergentti jýrnalıstıka taqyryby tóńireginde pikir almasyp, oıymyzdy ortaǵa saldyq. Sóz óneriniń alyptary eńbek etken «Egemen Qazaqstan» gazetiniń redaksııasynda ózekti de ótkir, endi birde erkin taqyryptardy tolǵana tarqatqanymyz úlken tájirıbe bolatyny sózsiz», deıdi 4-kýrs stýdenti Rashıd Kemelbek.
Bilim ordasy men BAQ arasynda stýdentterdiń óndiristik tájirıbeden ótý úrdisi burynnan bar bolǵanymen, sabaqtyń redaksııada ótýi alǵash qolǵa alynǵan ilkimdi joba ekenin aıtqan lázim.
