Sýretti túsirgen – Erlan OMAR, «EQ»
Elimizdegi zeınetkerler sany – 2 mln 428 myń adam. 2024 jylǵy 1 jeltoqsandaǵy jaǵdaı boıynsha jıyntyq zeınetaqynyń ortasha mólsheri 131 556 teńgege jetse, onyń ishinde yntymaqty zeınetaqy mólsheri – 88 967 teńge, bazalyq zeınetaqy – 42 589 teńge.
2018 jylǵy 1 shildeden bastap memlekettik bazalyq zeınetaqy tólemi zeınetaqy júıesindegi ótilin eskere otyryp, ár alýshyǵa jeke taǵaıyndalyp keledi. Bul rette 1998 jylǵy 1 qańtardan beri yntymaqty júıede jumys istegen ýaqyty, sondaı-aq mindetti zeınetaqy jarnalary (MZJ) tólengen kezeńder zeınetaqy júıesindegi eńbek ótiline qosylady.
Eger azamattyń zeınetaqy júıesindegi ótili 10 jyl nemese odan az bolsa, sondaı-aq múlde bolmasa, bazalyq zeınetaqy eń tómengi kúnkóris deńgeıiniń 65%-yna teń bolsa, sodan keıin 10 jyldan asqan ár jyl úshin onyń mólsheri 2 %-ǵa artady. Al eger eńbek ótili 20 jylǵa tolsa, bazalyq zeınetaqysy tómengi kúnkóris deńgeıiniń 85%-y mólsherinde bolady. Eńbek ótili 30 jyl nemese odan kóp bolsa, kúnkóris deńgeıiniń eń joǵarǵy mólsherinde, ıaǵnı 105% belgilenedi.
Eger bir aı ishinde mindetti zeınetaqy jarnalary Biryńǵaı jınaqtaýshy zeınetaqy qoryna birneshe ret aýdarylsa, jınaqtaýshy júıege qatysý merzimi bir aıdy quraıdy. Osylaısha, mindetti zeınetaqy jarnalary neǵurlym turaqty, tolyq kólemde aýdarylatyn bolsa, zeınet jasyna jetkende bazalyq zeınetaqy somasy solǵurlym qomaqty bolady. Ár azamattyń jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) ári zeınetkerlikke deıingi kezeńdegi ortasha aılyq tabysyna qaraı esepteledi.
