Bul kúni ortalyq stadıonǵa 300-ge jýyq adam jınaldy. Saıabaqqa aǵylǵandardyń barlyǵy derlik qur kelmeı, shańǵysyn ala kelipti. Jas-kári túgel júr. Úlken-kishi ózderiniń jas erekshelikterine sáıkes 500 metr, 2,5 km qashyqtyqta baq synady. Sońynda balalar, jastar, eresekter arasyndaǵy myqtylar iriktelip, júldeler bólek-bólek úlestirildi. Kópshiliktiń ortasynda júrgen Astana qalasy ákimdiginiń «Sporttyq-buqaralyq is-sharalardy ótkizý dıreksııasy» sporttyq-buqaralyq is-sharalardy josparlaý bóliminiń basshysy Kólbaı Janbekti áńgimege tartyp, pikirleskenimizde, ol qazirgi aýa raıy shańǵy tebýge taptyrmaıtynyn aıtty.
«Bıylǵy qys shańǵy jarysyn ótkizýge óte yńǵaıly. Shańǵy maýsymynyń ashylýyn osy ýaqytqa josparlaǵan sebebimiz – aýa raıyna baılanysty. Qardyń qalyńdyǵy shańǵy jolyn joǵary deńgeıde jasaýǵa múmkindik berip otyr. Shańǵy – qysqy sport túrleriniń arasynda eń tanymaldarynyń biri. Astanada shańǵymen aınalysatyn turǵyndardyń sany óte kóp. Búgin de shańǵy maýsymynyń ashylýyna shańǵyǵa baladan eńkeıgen qarııaǵa deıin qatysyp jatyr. Eń qart qatysýshymyzdyń jasy – 83-te. Shańǵy jarysynan bólek, shańǵy maýsymynyń ashylýynda belbeý kúresi, qol kúresi, arqan tartys, kir tasyn kóterý básekesinen saıys uıymdastyryldy», deıdi Kólbaı Janbek.
Shańǵy maýsymyna ata-anasymen kelgen eń jas qatysýshylarynyń biri, Keńshilik Ahmat qazir 9 jasta.
«Shańǵy maýsymyna adam kóp jınalypty. Balalar da az emes. Negizi ózim júzýmen aınalysamyn. Al qys mezgilinde shańǵyǵa den qoıamyn. Shańǵymen shuǵyldanǵanyma jyldan asyp qaldy. Sonyń arqasynda tózimdiligimdi arttyrdym. Sportta jetistikke jetsem, onyń ómirime de septigin tıgizetinine senimdimin. Sondyqtan jyl saıyn ata-anammen birge shańǵy tebýge kelýge tyrysamyn», deıdi kishkentaı shańǵyshy.
Shańǵy maýsymynyń ashylýynda jarysqa qatysqan qala turǵyndary 7 jas sanaty boıynsha synǵa tústi. Máre syzyǵyn alǵashqylardyń biri bolyp kesip, júldege ilikkender medal, baǵaly syılyqtarmen marapattaldy. Osylaısha, qala turǵyndary taǵy bir kúndi shat-shadyman kóńil kúıde ótkizdi.
