Foto: elordainfo.kz / Baqtygúl Býrbaeva
Eńbek jáne halyqty áleýmettik qorǵaý mınıstrliginiń málimetinshe, byltyr memlekettik áleýmettik járdemaqy (MÁJ) múgedektigi boıynsha 552,3 myń adamǵa, asyraýshysynan aıyrylý jaǵdaıy boıynsha 193,9 myń adamǵa berilgen.
Múgedektigi boıynsha memlekettik áleýmettik járdemaqylardyń mólsheri múgedektiktiń tobyna, sebebine qaraı belgilenedi. Sondaı-aq tıisti qarjy «Respýblıkalyq bıýdjet týraly» zańda belgilengen eń tómen kúnkóris deńgeıiniń mólsherine baılanysty esepteledi.
Asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri qaıtys bolǵan asyraýshysy ajalynyń sebebine, qamqorlyǵyndaǵy adamdardyń sanyna, ári eń tómen kúnkóris deńgeıine baılanysty bolady.
Budan bólek, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda memlekettik áleýmettik saqtandyrý qorynan tólemder aýdarylady. 2024 jyly 102,3 myń adam eńbek etý qabiletinen aıyrylǵandyqtan áleýmettik tólem alsa, 67,9 myńǵa jýyq otbasyna asyraýshysynan aıyrylýyna baılanysty áleýmettik tólem berilgen.
2025 jylǵy 1 qańtardan bastap múgedektigi boıynsha, asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri eń tómen kúnkóris deńgeıiniń ulǵaıýyna baılanysty 6,5%-ǵa ósti. Úkimettiń sheshimimen eńbekke qabilettiliginen, asyraýshysynan aıyrylý boıynsha MÁSQ-dan tólenetin tólemderdiń mólsheri de 6,5%-ǵa artty. Osylaısha, múgedektigi boıynsha MÁJ mólsheri I top úshin – 101 702 teńge, II top úshin – 81 362 teńge, III top úshin 55 474 teńgege jetti.
Bıylǵy 1 qańtardaǵy jaǵdaı boıynsha eńbekke qabilettiliginen aıyrylý boıynsha áleýmettik tólemderdiń ortasha mólsheri 60 407 teńge, asyraýshysynan aıyrylý boıynsha 64 772 teńge boldy.
