Aıtýly jobany elorda ákimdigi men respýblıkalyq ǵylymı-praktıkalyq «Daryn» ortalyǵy jáne «Astana daryny» ortalyǵymen birlesip, iske asyrdy. Osy oraıda «Astana daryny» ortalyǵynyń dırektory Janar Beısenbaevanyń aıtýynsha, bul joba bas shahardyń brendine aınalyp, ár elden kelgen jas robottehnıkterdiń ózara tájirıbe almasatyn alań ekenin atap ótti.
Bul bilim dodasy mektep oqýshylary arasynda robottehnıka salasyn jetik meńgergen úzdikterdi anyqtaýǵa baǵyttalǵan. 2022 jyly qalalyq deńgeıde bastalǵan týrnır, qazir halyqaralyq deńgeıge kóterildi. Alǵash ret chempıonatqa AQSh, Bolgarııa, Ázerbaıjan, Moldova, О́zbekstan, Qyrǵyzstan, Tájikstan elderinen kelgen 25-ten asa sheteldik komanda qatysqan edi. Búginde biregeı baıqaýdyń tanymaldylyǵy artyp, aýmaǵy keńeıgen.
Osy oraıda, WRO Ázerbaıjan boıynsha ulttyq uıymdastyrýshysy Kenan Karımov aldymen joba jetekshilerine rızashylyǵyn bildirdi.
«Biz Qazaq eline kelgen kúnnen jylylyqty sezindik. Shyn máninde, robottehnıka — mehanızmder týraly ǵylym ǵana emes. Bul — jastar men balalar úshin óte jaqsy platforma. Sebebi robottehnıkamen aınalysqanda sen jańa dostar tabasyń, solarmen birge jańa ıdeıalar izdeısiń. Menińshe, jastardyń bastamalary men ıdeıalary óz elderimiz ben bolashaq urpaqtyń damýyna úles qosady dep senemin», dedi ol.
Jalpy alǵanda, týrnıge 9-17 jas aralyǵyndaǵy 350-ge tarta mektep oqýshysy 7 sanat boıynsha baq synady. Ár baǵyttyń óz ereksheligi men erejesi bar. Sony buljytpaı oryndaǵandar top jaryp, júldeli oryndardy ıelendi.
Sonymen, chempıonattyń bas júldesi, ıaǵnı Qazaqstan-Brıtan tehnıkalyq ýnıversıtetiniń Aqparattyq tehnologııalar jáne ınjenerııa mektebi grantyn almatylyq oqýshylar Ernur Erejep pen Aslan Qabdýllov jeńip aldy. Al jarysqa Abaı oblysy Úrjar aýdanynan kelgen Dmıtrıı Polejaev Almaty energetıka jáne baılanys ýnıversıtetiniń bolashaq stýdenti atandy. Al «Úzdik sheteldik komanda» atalymy О́zbekstannan kelgen jetkinshekterge buıyrdy. Sondaı-aq týrnırde erekshe kózge túsken oqýshylarǵa da baǵaly syılyqtar men dıplomdar tabys etildi.
Farıza IZBASAROVA,
L.N.Gýmılev atyndaǵy Eýrazııa ulttyq ýnıversıtetiniń stýdenti
