Sýretti salǵan – Aıdarbek ǴAZIZ
– Kóke, nege Jaıaý Musa bop júrsiz? Qaıda barasyz, aparyp tastaıyn, – dedi quraq ushyp.
– Rahmet, balam, óziń qaı balasyń, shyramytyp turmyn.
– Nasybaıshy Qasymbektiń nemeresimin. Atadan qalǵan dástúr ǵoı, – dep ernindegi nasybaı qaldyǵyn suq saýsaǵymen sylyp alyp, jerge tastady.
– Atyń kim?
– Ázim.
– Ázimjan, men aýylǵa jaıaý júrý úshin kelemin. Áıtpese tórt dóńgelek kóp qoı.
– Oı-ı, sizdi de jazýshy dep júrmiz ǵoı. – Qaltasynan nasybaı shaqshasyn shyǵaryp.
– Mynaǵan qalaısyz? – dedi.
– Qoıǵanbyz, nıetińe rahmet!
Dóńkıgen qońyz máshıne gúr etip júrip ketti.
Jaıaý Musa qara joldyń boıynda qalyp qoıdy.
Polısııa men prokýror
Elge barǵanda polısııa qurdasym qonaqqa shaqyrdy. Aýdannyń «betkeustary» ári ústinen qaraıtyn baqylaýshy bolǵasyn ba, prokýrordy qosa shaqyrypty. Ekeýi de qyzmettik forma kıip, pogon taǵyp otyrdy. Sóz saptaýlaryna qaraǵanda ekeýi dúnıeni ustap tur, basqalardyń bári qalqyǵan kómeski beıneler. Bir-biriniń aýzyna túkirip qoıǵandaı ilip áketip, áýleki sózdiń tigisin jatqyzyp, áńgime ataýlynyń tizginin ustap otyr. Bir mezet prokýror:
– Sizderdiń jumystaryńyz qur sóz ǵoı, – dep meniń tirshiligime shúılikti.
– Bul kisiler sózben kún kórip júr ǵoı, – dep polısııa da qostap qoıdy.
Endi men de taqyrypqa tereńdep kiristim.
– Qaraǵym, sen «Álippe» oqyp, qara tanydyń. «Qazaq tilin» oqyp, til syndyrdyń. «Ana tilin» oqyp, taqpaq jattadyń. Zań fakýltetine túserde ádebıetten shyǵarma jazyp, tarıhtan aýyzsha synaq tapsyrdyń. Osynyń bári matematıka emes, sóz ǵoı. Sen joǵaryǵa bergen esebiń men jınalysta jasaǵan baıandamańdy da sózben aıtpaısyń ba? Sottalýshyny da dúıim jurttyń aldynda sózben qaralamaısyń ba? Jaraıdy, sen men ketisimen aýyldyń amandyǵyn aıtyp, maǵan bir bet hat jazshy, sózdiń aldyndaǵy kúshińdi kóreıin.
Prokýror «asyǵys edim» dep ketip qaldy.
Polısııa shekpenin sheship, demin aldy.
Men hat kútip júrmin.
Qýandyq TÚMENBAI,
jazýshy
