Qazaqstan halqy Assambleıasy Jýrnalıster klýbynyń keńeıtilgen otyrysy ótti. Sharaǵa QHA Tóraǵasynyń orynbasary – Hatshylyq meńgerýshisi Eraly Toǵjanov pen Májilis depýtattary jáne buqaralyq aqparat quraldarynyń ókilderi qatysty. Alqaly jıynda otandyq BAQ salasyn jańǵyrta otyryp, qoǵamdyq kelisim men jalpyulttyq birlikti nyǵaıtý, «Máńgilik El» Patrıottyq aktisin ilgeriletý men ony jurtshylyqqa túsindirýde QHA Jýrnalıster klýbynyń róli talqylandy.
E.Toǵjanov eń aldymen til máselesine toqtalyp ótti. Til – ulttar tatýlyǵyn saqtap, beıbit zamanda mamyrajaı ǵumyr keshýdiń birden-bir tetigi. Ol qaı kezde de qoǵamnyń qyzý talqysynda, jurtshylyqtyń nazarynda bolyp keletin dúnıe ekendigin bárimiz bilemiz. Sondyqtan da Assambleıa ulttar yntymaǵyn arttyryp, qazaq tiliniń mártebesin kóterýge qandaı úles qosyp jatqanyn osyndaı is-áreketimizben naqty kórsetkimiz keledi. Bul baǵytta atqaryp jatqan aýqymdy sharalarymyz az emes. Sonyń biri – BAQ ókilderimen birlese jumys isteý arqyly yntymaǵymyzdy saqtaý, tatýlyqty tý etip, bereke-birlikti dáripteý, dedi ol.
Otyrysta ulttardy uıystyrýǵa shaqyratyn ulttyq qundylyqtardy aqparattyq nasıhat retinde keńinen qoldaný kerektigi de aıtylyp, ondaı pikir qyzý qoldaýǵa ıe boldy. Bul máseleni «Aıqyn» respýblıkalyq qoǵamdyq-saıası gazetiniń bas redaktory Nurtóre Júsip kóterdi. Ol «Máńgilik El» Patrıottyq aktisin ilgeriletý men túsindirýdegi QHA Jýrnalıster klýbynyń róli» atty taqyrypta sóılegen sózinde birqatar máseleni sóz etti. Solardyń ishinde erekshe atap ótkim keletini Memleket basshysynyń bastamasymen shyǵarylǵan ulttyq baılyǵymyzdyń biri – «Qazaqtyń myń áni men kúıi» degen ǵajap jobasy edi. Osyndaǵy án men jyr, kúılerimizdi tatýlyǵymyzdy aırandaı uıytýǵa nege keńinen qoldanbasqa?! Máselen, babadan qalǵan osyndaı baılyqtarymyzdy memlekettik satyp alý qyzmeti arqyly radıotolqyndyq jıilikter men teleekrandardan nege kórsetpeımiz?! Bul jerde júzden astam ult ókilderiniń turaqtylyǵyn saqtaǵan memleket retinde mindetteýge haqymyz bar shyǵar. Asylynda, mundaı ulttyq qundylyqtarymyz ulttardy uıystyra túsetindigine bek senimdimin, dedi N.Júsip.
Sondaı-aq, ol óz sózinde halyq birligin saqtaýda mádenı baılanys pen salt-dástúrdi ushtastyratyn qarym-qatynastar týraly aıta kele, otandastar arasynda ótetin «Tilashar toılar» keńinen nasıhattalsa degen pikirin bildirdi. Sonymen qatar, ol áriptesterimizdi ulttar arasyndaǵy tatýlyqty baıandaýda «ózge ult» degen tirkestiń «ózge» sózin saqtana qoldanýǵa shaqyrdy. Sebebi, onyń pikirinshe, mundaǵy «ózge» sózi óz otandastarymyzdy shettetkendeı reńk beredi.
Jalpy, jıynda aıtylǵan oı-tolǵamdar nobaıy negizinen eki másele tóńireginde órbidi. Onyń biri – Assambleıa aıasyndaǵy Jýrnalıster klýbynyń jumysyn jetildirý bolsa, ekinshisi – ulttar arasynda ulttyq qundylyqtardy meılinshe nasıhattaý, taratý, tanytý. Alǵashqy baǵyt boıynsha aldaǵy ýaqytta QHA ókilderi men osy uıym atynan saılanǵan Májilis depýtattary jáne BAQ jetekshileri jergilikti jurtshylyqpen erkin pikir almasý úshin josparly túrde aımaqtardy aralaıtyndyǵy bekitilse, ekinshi baǵyt boıynsha jıynda aıtylǵan usynys, pikirlerdiń eshbiri de nazardan tys qalmaı, júzege asyrylatyn bolyp sheshim qabyldandy.
Osylaısha, Assambleıanyń otyrysynda ulttyq qundylyqtarymyzdy ulttarǵa keńirek nasıhattap, úıretýge úndegen oılar ústemdik qurdy. Jıyn sońynda Eraly Luqpanuly birqatar BAQ basshylyǵy men ókilderin tól merekelerimen quttyqtap, Qazaqstan halqy Assambleıasynyń qoǵamdyq «Birlik» altyn medali men Assambleıa atynan Alǵys hattar tapsyrdy.
Nurlybek DOSYBAI,
«Egemen Qazaqstan»