Aldaǵy jyldary elimizde qabyldanǵan «О́ńirlerdi damytý-2020» baǵdarlamasy aıasynda oblysta 226 aýyl ortalyqtandyrylǵan sý júıesine qosylmaqshy. Bizdiń aımaqta osy jylǵy baǵdarlamaǵa engen 20 aýyldyń arasynda Taqyr da bar eken. Baımoldın aýyldyq aýmaǵyna qarasty Taqyr, Tereńkól, Baımolda aýyldarynda 747 adam, bar-joǵy 232 otbasy turady.
– Mal-jan aman, endi geologtar jer qazyp, sý shyǵaryp beremiz degen edi, ony, árıne, qýana, asyǵa kútemiz. Aýyldarǵa eń keregi sý men jol ǵoı, sonda halyq ornyǵyp osy jerlerde qala beredi, – deıdi aýyl turǵyndary.
Al buǵan Taqyrdyń sý qoryn zertteýge kelgen «Pavlodar gıdrogeologııa» JShS geolog mamandary tereńdigi 50 metr shamasynda neogendi sý beldeý deńgeıi, al tereńdigi 200 metrge deıingi qabatta paleogendi sý beldeý deńgeıinde sý qory bar dep jaqsy málimet berýde. Gıdrogeologtar Taqyrdyń sý qory 25 jylǵa jetedi dep boljaıdy. Uńǵyma sekýndyna 12 lıtr sý bermekshi. Aýyldyń oǵan dep qajettiligi sekýndyna 4 lıtrdi quraıdy dep eseptep, jobalap ta qoıypty.
Oblystyq jer qoınaýyn paıdalaný, qorshaǵan orta jáne sý resýrstary basqarmasynyń málimetinshe, jerasty sýlary qoryn barynsha paıdalaný maqsatynda tushy sý kózderin zertteý jumystary qolǵa alyndy. Búginde 396 aýyldyń 110-ynda jerasty sý qory bary anyqtalypty. Sondaı-aq, Aqtoǵaı aýdanynyń – 5, Ekibastuzdyń – 7, Aqsýdyń 3 aýylyna jańa baǵdarlama boıynsha jerastynan sý shyǵarylyp beriledi dep kútilýde. Al basqarma mamandary uńǵymany qazý jáne zertteý uzaq ýaqyt júrgiziletindikten, barlaý jumystaryn 2017 jyldyń sońynda bitirmekshi.
Farıda BYQAI,
«Egemen Qazaqstan»
Pavlodar oblysy,
Lebıaji aýdany