Jarystar kúndeligi

AQSh-tyń Sent-Lýıs qalasynda erkin kúresten uıymdastyrylǵan RAF 10 týrnırinde Rızabek Aıtmuhan amerıkalyq apaıtós Heıden Zılmermen kúsh synasyp, 6:4 esebimen jeńiske jetti. Jarystyń bas­ty beldesýlerinde armenııalyq Arman Sarýkıan AQSh-tyń arlany, UFC-diń eks-chempıony Tonı Fergıýsondy aıqyn jeńse, BAÁ-niń týy astynda óner kórsetip júrgen cheshen jigiti Hamzat Chımaev pen taǵy bir amerıkalyq sportshy Dıllon Denıs arasyndaǵy aıqas jappaı tóbeleske ulasty. Báseke barysyna Dıllon Hamzatty qylqyndyrmaq boldy. Al RAF jarystarynda ondaı tásildi qoldanýǵa qatań ty­ıym salynǵan. Tóbeles toqtatylǵannan keıin jeńis Chımaevqa berildi. Jaqynda Serbııadaǵy týrnırde eń úzdik bapker dep tanylǵan Baqyt Sársekbaev kúni keshe ǵana Soltústik Make­do­nııada dál sondaı qurmetke bólendi. Beıjiń Olımpıadasynyń jeńimpazy jat­tyq­tyrǵan elimizdiń jastar quramasy Mıroslav Petrovıch memorıalynyń jal­py komandalyq esebinde birinshi oryn aldy. Otandyq boksshylar arasynan Arman Myrsábıt (55 kg), Nurmuhammed Aldabergen (65 kg), Shamsat Lesbaı (75 kg) bas júlde oljalady. El tennısshileri qart qurlyqta ótken túrli týrnırlerde baq synady. Lon­don­daǵy dodanyń basty favorıti sanalǵan álemniń ekinshi raketkasy Elena Rybakına shırek fınaldan asa almady. Ol WTA reıtınginde 73-oryndy enshilegen ulybrıtanııalyq Ketı Býlterden 5:7, 6:2, 4:6 esebimen utyldy. Aleksandr Býblık Shtýtgartaǵy jarystyń jartylaı fınalynda Teılor Frıspen kúsh synasty. Otandasymyzdyń ATR reıtınginde ózinen eki saty joǵary turǵan AQSh tennısshisine áli jetpedi – 4:6, 4:6. Aleksandr Shevchenko Bratıslavadaǵy básekeniń fınalyna shyqty. Bas júlde úshin tartysta ol japonııalyq Chına Taro Danıelge ese jiberdi – 6:3, 0:6, 6:7. Dmıtrıı Popko AQSh-taǵy týrnırdiń shırek fınalynda aýstralııalyq Enso Agııardan aılasyn asyra almady – 3:6, 6:7. Fýtboldan elimizdiń Premer-lıgasynyń 13-týryndaǵy basty báseke Semeıde «Elimaı» men «Ordabasy» arasynda ótip, shymkenttikter jeńiske jetti – 1:3. Olardyń basty qarsylasy «Qaırat» óz alańynda «Atyraýmen» teń oınady – 1:1. Negizi match almatylyqtardyń basymdyǵymen ótti. Olar 69-mınýtqa deıin alda turdy. Biraq sol mezette qaqpashy Temirlan Anarbekovtiń qateligin paıdalanyp, aıaǵyndaǵy dopty tartyp alǵan Aıbar Abdýlla tarazy basyn teńestirip ketti. Qalǵan matchtardyń nátıjeleri mynadaı: «Tobyl» – «Qyzyljar» 2:0, «Jetisý» – «Oqjetpes» 2:2, «Ulytaý» – «Jeńis» 2:1, «Astana» – «Ertis» 2:0 , «Kaspıı» – «Qaısar» 1:2, «Aqtóbe» – «Altaı» 2:0.