Almaty haıýanattar baǵy sırek kezdesetin janýarlarmen tolyqty. Halyqaralyq janýarlar almasý baǵdarlamasy aıasynda Qazaqstanǵa AQSh-tan kanadalyq sileýsinderdiń juby jetkizildi, dep habarlaıdy Egemen.kz.
Mysyq tuqymdasyna jatatyn jyrtqyshtar Almatyǵa 6 sáýirde ákelinip, mindetti veterınarlyq baqylaýdan ótkizilgen. Qazirgi tańda olar jańa ortaǵa tolyq beıimdelip, kelýshiler úshin kórmege shyǵarylǵan.
Sileýsinderdiń erkegi – 3 jasta, urǵashysy – 7 jasta. Olar zoobaqtaǵy «leopard sheńberi» dep atalatyn usaq jyrtqyshtarǵa arnalǵan voler keshenine ornalastyrylǵan.
Kanadalyq sileýsinder óz tuqymdastarynyń arasynda úlkendigimen erekshelenedi. Soltústik Amerıkanyń sýyq klımatyna beıimdelgen jyrtqyshty qulaǵyndaǵy shashaqtary men qalyń júni arqyly tanýǵa bolady.
Mamandardyń aıtýynsha, janýarlar jubynyń jańa ortaǵa beıimdelýi sátti ótse, olardan urpaq alý múmkindigi de qarastyrylyp otyr. Bul bıologılyq túrdi saqtaýǵa úlken múmkindik bolmaq.
Eske sala keteıik, buǵan deıin Reseı prezıdenti Vladımır Pýtın elimizge memlekettik sapary aıasynda tórt Amýr jolbarysyn syıǵa tartqan bolatyn. Jolbarystardyń atalyǵyna Amýr, analyǵyna Úmit esimi berildi. Al olardyń kúshikteri Turan jáne Ýssýrı dep ataldy.