Demalys kúnderi fýtboldan álem chempıonatynda Kanada men Bosnııa-Gersegovına, AQSh pen Paragvaı, Qatar men Shveısarııa, Brazılııa men Marokko, Gaıtı men Shotlandııa, Aýstralııa men Túrkııa, Germanııa men Kıýrasao kúsh synasty. Keshe Nıderland pen Japonııa, Kot-d’Ivýar men Ekvador, Shvesııa men Týnıs arasyndaǵy tartysty tamashaladyq.
Eki oıyn da teń aıaqtaldy
О́z tarıhynda Kanada álemdik dop dodasyna eki márte ǵana qatysty. Alǵashynda 1986 jyly Meksıkada, ekinshi ret 2022 jyly Qatarda baq synady. Sol chempıonattarda bas-aıaǵy alty oıyn ótkizip, jeńilisten kóz ashpady. «Er kezegi – úshke deıin» demekshi, Úıeńki japyraqtar eli ókilderine osy joly jaısyz statıstıkany túzeýge jaqsy múmkindik týyndady. Olaı deýge eki negiz bar. Birinshiden, Kanada – sporttyq sharany qabyldaýshy memleketterdiń biri, toptyq týrnırdi óz jerinde ótkizedi. Ekinshiden, tusaýkeser kezdesýindegi qarsylastary sonshalyqty myqty emes. HH ǵasyrdyń 90-jyldarynda ǵana Iýgoslavııadan bólinip shyqqan Bosnııa men Gersegovına osyǵan deıin mýndıalǵa bir ret qana qatysty. 2014 jyly Brazılııadaǵy týrnırde bosnııalyqtar bir oıynda utyp, ekeýinde utyldy.
Torontodaǵy «Bımo Flıd» stadıonynda tarıhı oqıǵa tirkelip, elimizdiń Premer-lıgasynda oınaıtyn fýtbolshy tuńǵysh ret álem chempıonatynda óner kórsetti. Ol – «Astananyń» jartylaı qorǵaýshysy Ivan Bashıch. Kezdesýdiń 21-mınýtynda dál sol havbektiń buryshtamadan bergen dobyn Iovo Lýkıch baspen qaqpaǵa dóp túsirdi. 78-mınýtta Karl Ların esepti teńestirdi – 1:1.
Qatar men Shveısarııa arasyndaǵy matchtyń 17-mınýtynda Brıl Embolo penaltıden gol soǵyp, komandasyn alǵa shyǵardy. Odan keıin de basymdyq eýropalyqtarda boldy. Biraq olardyń tolassyz shabýyly esh nátıje bermedi. Oıynnyń sońǵy mınýttarynda Býalem Hýhı tarazy basyn teńestirdi – 1:1.
AQSh aıbar kórsetti, Aýstralııa aldyrmady
Senbide «D» tobyndaǵy komandalar jarysy ótti. Los-Andjelestegi «Soý-Faı Stedıýmda» AQSh quramasy Paragvaıdy oısyrata utty. Barlyǵy jartylaı qorǵaýshy Damıan Bobadılıanyń 7-mınýtta óz qaqpasyna abaısyzda gol soǵyp alǵanynan keıin bastaldy. Birinshi taım aıaqtalǵanǵa deıin Foların Balogan eki márte mergendik tanytty. Negizi onyń het-trık jasaýy da múmkin edi. Biraq amerıkalyq shabýylshynyń taǵy bir doby esepke alynbady. Bul rette tóreshi «ofsaıd» belgiledi. 73-mınýtta Maýrısıo qarymta bir gol soqqanymen, 90+7-mınýtta Djovannı Reın tórtinshi dopty torda týlatty – 4:1.
Aýstralııa men Túrkııa arasyndaǵy kezdesýdiń favorıti túrikter edi. Alaıda jarysqa óte jaqsy daıyndyqpen kelip, saýatty taktıka qura bilgen jasyl qurlyq fýtbolshylary qarsylastarynyń bar josparyn kúl-talqan etti. Dopqa ıelik etý, soqqy jasaý, qaqpany jıi torýyldaý, basqa da qımyldar jóninde basymdyq Andoly eli ókilderinde bolǵany ras. Biraq olar odan eshteńe óndire almady. Aýstralııalyqtar az shabýyldaǵanymen, eki ret nysanany dál kózdep, túrikterdi sazǵa otyrǵyzdy. Birinshi kezeń bel ortadan aýǵan tusta, qarymta shabýyl kezinde Nestorı Irankýnda esep ashty.
Úzilisten keıin jeńip jatqan komanda túrkııalyqtardyń sansyz shabýylyna toıtarys berip qana qoımaı, 75-mınýtta Konnor Metkalf alys buryshty dál kózdedi – 2:0.
«Atlas arystandary» «Pentakampeondarǵa» tótep berdi
Astana ýaqytymen 03:00-de Brazılııa men Marokko sheberlik baıqasty. «Atlas arystandary» álemniń bes dúrkin chempıondarynan esh qaımyqqan joq. Oıynnyń alǵashqy mınýttarynda afrıkalyqtar alǵa umtylyp, Peleniń otandastaryn ábden qyspaqqa aldy. Karlo Anchelottıdiń komandasy óz qaqpalaryna qaraı yǵysty. «Pentakampeondar» birte-birte óz-ózderine kelip, shabýyldaı bastaǵan edi, alańynyń ortasynan Braım Dıas Ismael Saıbarıge keremet pas berdi. Kóz ilispes jyldamdyqpen Gabrıel Magalıaıns men Markınostyń arasynan sytylyp shyqqan PSV-niń jartylaı qorǵaýshysy dopty Alısonnan asyra saldy.
Qapııada jiberip alǵan goldan keıin de brazılııalyqtardyń oıyny úılespedi. Tek 32-mınýtta ǵana Vınısıýs Jýnıor tarazy basyn teńestirdi – 1:1. Madrıdtiń «Realynyń» juldyzy óz stılinde keremet soqqy jasap, dopty torǵa toǵytty. Shyny kerek, bul básekede Brazılııanyń basymdyǵy baıqalmady. Kerisinshe, Marokkonyń fýtbolshylary tamasha oınady. Tehnıkalary jetik, taktıkalyq saýattylyǵynda esh min joq. Drıblıng jasaý, dál pas berý jaǵynan da Mohamed Ýabıdiń shákirtteri «fýtbol sıqyrshylarynan» kem soqpady. Qos komanda da birneshe múmkindik bolǵanymen, básekeniń sońyna deıin teń esep saqtaldy.
Tań ata «S» tobyndaǵy kelesi jup – Gaıtı men Shotlandııa quramalary alańǵa shyqty. 28 jyldan keıin mýndıalǵa qaıta oralǵan eýropalyqtar bul matcha jeńiske jetti – 0:1. Jalǵyz goldy 28-mınýtta jartylaı qorǵaýshy Djon Makgınn saldy.
Segiz gol soǵylǵan oıyn
«E» tobyndaǵy tartysty Germanııa men Kıýrasao quramalary bastady. Kezinde Anglııanyń dańqty fýtbolshysy Garı Lınekerdiń «Fýtboldy 22 adam oınaǵanymen, túbi nemister jeńiske jetedi» dep aıtqan qanatty sózi bar. Al nebári 150 000 halqy bar, Karıb teńizinde ornalasqan shaǵyn ǵana eldiń fýtbolshylary álemdik dop dodasyna joldama alady dep eshkim de oılamap edi. Bir aıta keterligi, Kıýrasao KONKAKAF aýmaǵynda ótken irikteý týrnırinde birde-bir ret jeńilistiń kermek dámin tatqan joq. Ekinshi kezeńde olar Gaıtı, Sent-Lıýsııa, Arýba, Barbadostan basym tússe, úshinshi týrda Iаmaıka, Trınıdad pen Tobago, Bermýd araldaryn artqa tastady. Barlyǵy 10 kezdesýde 7 ret jeńiske jetip, 3 oıyndy teń aıaqtady. Dop aıyrmashylyǵy – 28:5.
Mýndıalda Kıýrasao dańqy alysqa taraǵan Germanııamen jarty saǵattan asa ýaqyt tiresti. 6-mınýtta Felıks Nmecha soqqan dopqa olar 21-mınýtta Lıvano Komenensııanyń golymen jaýap berdi. Birinshi kezeńniń aıaqtalýyna shamamen 10 mınýttaı ýaqyt qalǵanda «nemis mashınasy» ot aldy. Endi olardy toqtatý múmkin emes edi. Nıko Shlotterbek (38- mınýt), Kaı Havers (45+5 mınýt, penaltıden), Djamal Mýsıala (47-mınýt), Natanıeel Braýn (68-mınýt), Denız Ýedav (78-mınýt) birinen soń biri nysany dál kózdep, esepti 7:1-ge jetkizdi.
Jeksenbi kúngi ózge matchtar mynadaı nátıjemen aıaqtaldy: Kot-d’Ivýar – Ekvador («E» toby) 1:0, Nıderland – Japonııa («F» toby) 2:2, Shvesııa – Týnıs (F toby) 5:1.