Qazaqstannyń bokstan olımpııalyq quramasy keshe túnde Rıo-de-Janeıoroǵa aman-esen jetti. «Habar» telearnasy tilshisiniń habarlaýynsha, sportshylardyń bári Brazılııa jerine jetken boıda olımpııalyq qalashyqqa ornalasqan.
Olımpıadaǵy boksshylar týrnıri 6 tamyzda bastalyp, Oıyndar jabylǵanǵa deıin sozylady.
Eske sala keteıik, Qazaqstannyń erler quramasy bul joly Olımpıadaǵa alǵash ret 10 salmaq boıynsha jarysqa ókilin qoıyp, tolyq quramymen qatysqaly otyr. Bul quramda Birjan Jaqypov (49 kg), Oljas Sáttibaev (51 kg), Qaırat Erálıev (56 kg), Berik Ábdirahmanov (60 kg), Abylaıhan Júsipov (64 kg), Danııar Eleýsinov (69 kg), Jánibek Álimhanuly (75 kg), Ádilbek Nııazymbetov (81 kg), Vasılıı Levıt (91 kg) jáne Ivan Dychko (+91) bar.
Osy joly Birjan úshinshi márte Olımpıadaǵa qatysqaly tur. Al Danııar Eleýsinov, Ádilbek Nııazymbetov jáne Ivan Dychko úshin bul ekinshi Oıyndar bolmaq. Munyń aldynda, 2012 jyly Londonda Ádilbek – kúmis, Ivan qola medal jeńip alǵan.
Áıelder boksynda týrnırde úsh salmaq boıynsha medaldar sarapqa túsedi. Sonyń eki salmaǵynda qazaqstandyqtar Jaına Shekerbekova (51 kg) men Darıǵa Shákimova (75 kg) saıysqa qatysady. Al 64 kg salmaqta bizdiń boksshymyz Zarına Soloeva lısenzııa ala almady.
«Habar» telearnasy qazaqstandyq sportshylardyń qatysýlarymen ótetin barlyq sport jarystarynan tikeleı efırde habar berip turady.
Damır QOJAMQUL