Tekti ózgertýdiń taýqymeti

Keńes ókimeti kezinde aýyldyq keńeste otyrǵan ózge ult ókilderiniń kesirinen talaıymyzdyń aty-jónimiz burmalanyp, áli kúnge sonyń zardabyn tartýdamyz. Máselen, ata-anamnyń azan shaqyryp qoıǵan Erdáýlet atym «Erdavlet» bolyp jazylyp ketken. Men muny Táýelsizdik alǵan jyldary jóndep, birjolata «ov»-tan da qutylǵan bolatynmyn. Osymen bitken bolar dep júrsem... Jaqynda birinshi synypqa barǵan nemereme apaıy: «Tegińdi ózgert, ne qazaqsha, ne ózbekshe emes. Aıtylýy qıyn eken», degendi juqalap jetkizipti. Sóıtsem, nemeremniń tegi «Erdavlet» eken. Salyp uryp Neke saraıyna baraıyn. Ondaǵy ınspektor qyz ýájimdi tyńdap: «Nıetińiz durys, ol úshin ózińizden bastaý kerek. Sonan soń ulyńyzǵa kóshemiz, al nemerelerińiz sońynan. Ol úshin ózińizdiń Týý týraly kýáligińizdi ákelesiz», degen soń jerdiń shalǵaılyǵyna qaramastan aıtqan buıymtaıyn taýyp keldim. Kýálikti ári-beri tóńkerip kórgen ıns­pektor: – Endi áke-shesheńizdiń Týý týraly kýá­likterin ákelińiz, – degeninde shart kettim. – Tegin ózgertetin nemereme súıekteri áldeqashan qýrap ketken meniń áke-sheshemniń ne qatysy bar. Aınalaıyn-aý, mynaýyń qyp-qyzyl tekti ózgertý emes, ata-tekti túgendeý bolyp ketti ǵoı. 40 jyl bu­ryn qaıtys bolyp ketken ákemniń Týý týra­ly kýáligin qaıdan tabamyn, – desem: – Bizde zań solaı! – degen jaýabyn esti­dim. Osy ýaqytqa deıin talaı qyzyqty kórip edim, dál mynadaı «qyzyqty», qyzyq­ty emes-aý, «shyjyqty» birinshi kórýim. Tegin ózgertýdiń mundaı taýqymeti baryn biletinder sodan keıin eken ǵoı, «ov» pen «ova»-dan ajyramaı júrgenderi. Eger ıns­pektor aıtqandaı, anyq zań solaı bolsa, onda bul degenimiz tekti ózgertýdegi taza ke­dergi emes pe? Sultan ERDÁÝLET Ońtústik Qazaqstan oblysy, Saıram aýdany