Jekeshelendirýdiń ekinshi kezeńiniń aralyq qorytyndysy boıynsha 314 nysan satyldy. Bul týraly búgin Ortalyq kommýnıkasııalar qyzmetinde ótken baspasóz máslıhatynda aıtyldy. Oǵan Qarjy mınıstrliginiń Memlekettik múlik jáne jekeshelendirý komıteti tóraǵasy Edýard О́tepov, Respýblıkalyq menshik obektilerin satý jáne jekeshelendirýden keıingi baqylaý basqarmasy basshysy Dáýletbaı Shaǵyrov, «Aqparattyq-esepteý ortalyǵy» AQ basqarma tóraǵasy Janasyl Ospanov qatysty. Olar jekeshelendirý jumystarynyń osy kezeńge deıingi nátıjelerimen bólisip, satylǵan nysandar týraly aqparat aıtty.
2014-2016 jyldarǵa arnalǵan satý kestesine sáıkes, satýǵa 622 nysan josparlanǵan eken. Tamyzǵa deıingi kezeńde 523 nysan jekeshelendirýge josparlanǵan. Al 26 qyrkúıektegi jaǵdaı boıynsha is júzinde saýdaǵa 509 nysan shyǵarylypty, onyń 314-i satyldy.
«Onyń ishinde respýblıkalyq menshik boıynsha – 19, kommýnaldyq menshik boıynsha – 157, áleýmettik kásipkerlik korporasııalar boıynsha – 81, holdıngter boıynsha – 57 nysan bar. Bul rette, satýdan túsken qarajattyń 7 mlrd teńgesi respýblıkalyq bıýdjetke, 5,1 mlrd teńgesi oblystyq bıýdjetterge, 68,1 mlrd teńgesi holdıngterge, 6,4 mlrd teńgesi áleýmettik kásipkerlik korporasııalarǵa baǵyttalǵan», dedi E.О́tepov.
Respýblıkalyq menshik boıynsha 2014 jyldyń maýsymynan 2016 jyldyń qyrkúıegine deıingi kezeńde satýǵa 27 nysan josparlanǵan. Bıylǵy jyldyń 28 qyrkúıektegi jaǵdaıy boıynsha saýda-sattyqqa 27 nysan shyǵarylyp, onyń 19-y satylǵan. Al kommýnaldyq menshik boıynsha 273 nysan jekeshelendirýge jatady. Is júzinde 28 qyrkúıektegi jaǵdaı boıynsha 254 nysan saýdaǵa shyǵarylyp, onyń 157-si satylǵan.
Áleýmettik-kásipkerlik korparasııalar boıynsha 105 nysan jekeshelendirýge jatady. Bul rette 104 nysan satýǵa qoıylyp, onyń 81-i satylyp ketken. Ulttyq kompanııalar men holdıngter boıynsha 28 qyrkúıektegi jaǵdaıǵa sáıkes satýǵa josparlanǵan 136 nysannyń 124-i saýda-sattyqqa shyǵarylyp, onyń 57-si satylǵan.
Dınara BITIKOVA