«Qazaqstan temir joly» UK» AQ basshysy Qanat Alpysbaev bastaǵan delegasııa Tallındegi Dostastyqqa qatysýshy elderdiń Temir jol ákimshiligi keńesiniń 65-otyrysyna qatysty, dep habarlady «Qazaqstan temir joly» UK» AQ-tyń baspasóz qyzmeti. Tallınge Ázerbaıjan, Armenııa, Belarýs, Qyrǵyzstan, Moldova, Reseı, Tájikstan, Túrikmenstan, О́zbekstan, Ýkraına temir jol ákimshilikteriniń basshylary men Keńestiń qaýymdastyq músheleri – Bolgarııa, Grýzııa, Latvııa, Fınlıandııa temir jol ákimshilikteriniń basshylary da qatysty. Otyrysta Keńestiń 64-otyrysy sheshimderiniń oryndalý nátıjesi men temir joldardy paıdalanýdyń 2016 jylǵy toǵyz aıynyń qorytyndysy qaraldy. Onyń ishinde, poıyzdardyń qozǵalys kestesi, júk poıyzdaryn jáne halyqaralyq baǵdardaǵy konteınerlik vagondardy jasaqtaý jospary, júk vagondary tizimin jasaý, konteınerlik vagondardyń mamyr – qyrkúıek aılaryndaǵy tizimderin túzýdiń aldyn ala qorytyndysyn shyǵarý jumystary talqylandy. Sonymen qatar, qatysýshylar 2016 jyldyń toǵyz aıyndaǵy temir jol ákimshilikteri arasyndaǵy ózara esep aıyrysý týraly aqparattarmen almasty. Temir jol kóligin toqtaýsyz júrgizý, Dostastyqqa qatysýshy elder arasyndaǵy temir joldarmen jolaýshy jáne júk poıyzdarynyń kedergisiz qozǵalysyn qamtamasyz etýge qatysty ondaǵan másele qaralyp, kelisildi. Otyrysta TMD elderi temir jol jelilerindegi bıylǵy toǵyz aıda júk tıeý jospary ótken jyldyń sáıkes merzimimen salystyrǵanda 8, 3 mln tonnaǵa artyǵymen oryndalǵany kóldeneń tartyldy. Tıelgen júkterdiń jalpy kólemi 1 mlrd tonnaǵa jetkizilgen, al júk aınalymy 0,6%-ǵa ósken. Mindettemesin asyra oryndaǵan temir jol ákimshilikteriniń ishinde «Qazaqstan temir joly» UK» AQ ta bar. Ol mindettemesin 2 paıyzǵa asyra oryndady. Bıylǵy jyldyń toǵyz aıynda júkterdi konteınerlik tasymaldaý jospary ótken jylmen salystyrǵanda 1,7 mıllıon tonnaǵa artyǵymen oryndaldy. Al memleketaralyq túıisý núktelerindegi qabyldanbaǵan júk vagondarynyń jalpy kólemi 21%-ǵa azaıdy. Otyrysta 2016-2017 jyldardaǵy halyqaralyq vagon aǵymdaryn retteý ýaqyty poıyzdardyń 2016 jylǵy 11 jeltoqsandaǵy júrý kestesimen sáıkestendirildi. Tallınde «QTJ» UK» AQ prezıdenti Q.Alpysbaev «Reseı temir joldary» AAQ prezıdenti O.Belozerovpen, Belarýs temir jolynyń bastyǵy V.Morozovpen kóliktik-logıstıkalyq sharalardy birlesip uıymdastyrý jaıyn aqyldasty. Sondaı-aq, bazalyq konteınerlik qyzmet kórsetý, qozǵalys jyldamdyǵyn ósirýdegi tarıf saıasaty máseleleri talqylandy. Sonymen qatar, Q.Alpysbaevtyń О́zbekstan, Tájikstan, Túrikmenstan, Lıtva elderi arasyndaǵy júk tasymaldaý kólemin arttyrý maqsatynda qolaıly jaǵdaılar jasaýǵa arnalǵan ózara kezdesýleri ótkizildi. Dostastyqqa qatysýshy elder Temir jol ákimshilikteri keńesiniń 66-otyrysyn 2017 jylǵy mamyrda Reseıde ótkizý kelisildi.