«Bala kezimde fýtbolǵa qatty qyzyqtym, únemi jattyǵyp júrdim. Biraq fýtbolǵa barýǵa múmkindik bolmady. Mektep bitirgen soń, Gomeldegi orman sharýashylyǵy ınstıtýtyna syrttaı oqýǵa tústim. Ol men týyp-ósken Rechısaǵa jaqyn jerde. Úıde bos otyra berýge bolmaıdy, sondyqtan bazarda júk tıeýshi bolyp jumys isteı bastadym. Demalys kúnderi aǵalarymmen, dostarymmen fýtbol oınap turýshy edik.
Oılamaǵan jerden kásibı túrde aınalysyp kettim. Oǵan jaqyn dosym kómektesti. Onyń ákesi meniń birinshi bapkerimmen jaqyn tanys eken. Olar meniń fýtbolmen aınalysýym kerektigin jıi aıtyp otyratyn. Keıinnen sol birinshi bapkerim Belarýstiń ekinshi lıgasynda oınaıtyn Kalenınkovıchtiń «Vertıkalı» klýbynda meni tekserýden ótkizýge kelisip berdi. Oılanbastan fýtbolǵa kettim», – dep eske aldy Ivan Maevskıı.
Ivan Maevskıı Belarýs chempıonatyndaǵy kezin karerasyndaǵy eń mańyzdy kezeń dep esepteıtinin jasyryp qalmady.
«Belarýs chempıonaty kásibı túrde damýyma septigin tıgizdi. Maǵan úlken fýtbolǵa jol ashqan alǵashqy komanda Mınskiniń MTZ-RIPO klýby bolatyn. Ol jerde meni Joǵary lıgasynda synap kórdi, súrinbeı óttim. Dál osy komandada ózime degen senimim arta tústi. Kóp tájirıbe jınadym. Biraq osy kúnge deıin Belarýs Kýbogyna ǵana qol jetkizdim. Kóptegen mamandarmen, fýtbolshylarmen daıyndaldym», – dedi «Astana» oıynshysy.
Al Belarýs chempıonatynan keıin Polshaǵa qalaı aýysqan eken? Ivannyń aıtýynsha, kútpegen jerden usynys kelgen eken.
«Bul qyzyq boldy. «Mınsk» sapyndaǵy kezekti maýsym aıaqtalǵan kez bolatyn. Bir agent maǵan shabýylshy dosym Aleksandr Makastyń nómirin surap telefon soqty. Áńgime arasynda oǵan sheteldik klýbtarda baq synap kórgim keletinin aıtyp qaldym. Biraz sóılestik, sonymen bitti. Kúnderdiń birinde Egıpette demalyp júrgenimde, Polshada múmkindik baryn aıtyp, habarlasty. Oılanbastan birden kelistim. Osylaısha jańa jyldan keıin Polshaǵa «Zavısha» komandasyna kóshtim», – dedi Maevskıı.
Ivan Maevskıı Polshada jaqsy qyrynan kózge túskenmen, komandasy sátti oınaı almady. Maýsym sońynda «Zavısha» premer-lıgadan shyǵyp qaldy.
«Ras, ol jerde men úshin bári jaqsy boldy. О́kinishke qaraı, komandamyz qıyn jaǵdaıǵa tap boldy. O bastan múmkindigimiz az boldy, kesteniń sońynda biraz ýaqyt turyp qaldyq. Biraq maýsymnyń ekinshi jartysyn oıdaǵydaı bastadyq, segiz oıyn qatarynan eshkimge ese jibermedik. Lıgadaǵy ornymyzdy saqtap qalý múmkindigi de paıda bola bastady. Biraq sońynda az ǵana upaı jetpeı qaldy.
Jańa komandaǵa kelip, birden sińip ketý ońaı emes. Muny nemen baılanystyrýǵa bolatynyn da bilmeımin. Biraq bir aıtarym, áriptesterimmen, bapkerimmen, klýb basshylyǵymen qarym-qatynasym jaqsy boldy. О́zimdi úlken otbasynyń bir múshesindeı sezindim. Bálkim osy jaǵy maǵan oń áserin tıgizgen bolar», – dedi fýtbolshy.
Maevskııdiń karerasyna úńilsek, transfer kezinde Reseıdiń «Anjıi» sekildi eshqandaı komanda qomaqty qarjy usynbapty.
«Eń kóp jalaqyny da sonda júrip alǵan edim. Jurt osy jaıly kóp talqylady. Qalaı bolǵanda da, ol kareramdy jalǵastyrý úshin jaqsy jol boldy dep senimdi túrde aıta alamyn. Reseı chempıonaty álemdegi myqty chempıonattardyń biri. Sondyqtan «Anjı» sapyna aýysqanyma tek qýanyshtymyn», – dedi Maevskıı.
Ivan Maevskıı «Astanaǵa» aýysqannan keıin kópshilik ony Roher Kanıaspen salystyrǵany belgili.
«Shynymdy aıtsam, buǵan múldem mán bermeımin. Men ózime, óz oıynyma senimdimin. Jurttyń Rohermen salystyrýynan qoryqpaımyn. Onyń ústine, ekeýimiz eki túrli fýtbolshymyz», – dedi ol.
«Astananyń» jańa oıynshysy osyǵan deıingi jolyqqan qarsylastary jaıly da oı bólisti.
«Belarýs quramasymen Ispanııaǵa qarsy oınadyq. Olarda bilikti fýtbolshylar jeterlik. Máselen, Davıd Sılvany alaıyq. Odan dopty alý múmkin emes. Shamasy, maǵan eń qıyn qarsylas bolǵan oıynshylardyń biri sol shyǵar», – dedi «Astananyń» 18-nómirli oıynshysy.
Bir qyzyǵy. Ivan Maevskıı áli kúnge deıin Chempıondar lıgasynda oınamapty. Aıtýynsha, elordalyq klýbpen osy týrnırge joldama alý úshin baryn salmaq.
«Iá, bul men úshin ázirge baǵynbaı tur, biraq jaqynda onyń ornyn toltyramyn dep oılaımyn. «Astananyń» Chempıondar Lıgasynyń toptyq kezeńine shyǵýy úshin barymdy salýǵa daıynmyn, qajet bolsa, tipti janymdy berýge daıynmyn.
Qazaqstannyń úsh dúrkin chempıony atanǵan komandaǵa qosylǵanyma qýanamyn. Kópshilik artqan senimdi aqtaýǵa tyrysamyn», – dep sózin aıaqtady 28 jastaǵy oıynshy.
Daıyndaǵan Aıan Ábdýálı «Egemen Qazaqstan»