Otyrys barysynda Ulttyq komıssııanyń maqsattary men mindetteri, Memleket basshysynyń «Bolashaqqa baǵdar: rýhanı jańǵyrý» atty maqalasynda usynylǵan baǵyttardy iske asyrý joldary talqylandy.
Ulttyq komıssııa Prezıdent Jarlyǵymen qoǵamdyq sanany jańǵyrtý baǵdarlamasyn iske asyrý, eldiń odan ári ilgerilemeli mádenı-gýmanıtarlyq damýyn qamtamasyz etý maqsatynda qurylǵan bolatyn.
О́ziniń sózinde Á.Jaqsybekov qoǵamdyq sanany jańǵyrtý tek jaýapty ǵana emes, sondaı-aq, nátıjesine elimizdegi saıası jáne ekonomıkalyq jańǵyrýlar táýeldi eń kúrdeli ýchaske bolyp tabylatynyn atap kórsetti. «Memleket basshysy HHI ǵasyrda tabysqa jetý úshin ultymyzdyń, árbir qazaqstandyqtyń damý baǵytyn aıqyndap berdi. Bul tek jańa ınstıtýttar quryp, quqyqtyq normalar qabyldaý ǵana emes. Bul jerde áńgime qoǵamdaǵy qarym-qatynastardy júıeli jańartyp otyrý týraly bolyp otyr», dep atap ótti Á.Jaqsybekov.
«Mundaı maqsat aldymyzǵa bizdiń tarıhymyzda buǵan deıin qoıylyp kórgen emes. Oǵan jetý ádetten tys kózqaras pen erekshe sıpattaǵy sheshimderdi talap etedi. Buǵan qosa, búkil ortalyq jáne jergilikti memlekettik organdardyń, qoǵamdyq sektordyń judyryqtaı jumylýy qajet», dep atap kórsetti Qazaqstan Respýblıkasy Prezıdenti Ákimshiliginiń Basshysy. Osyǵan oraı, dep túsindirdi ol, Ulttyq komıssııa quramyna mınıstrler, ákimder, jetekshi qoǵamdyq-saıası, ǵylymı, bilim berý birlestikteri men sarapshylyq uıymdardyń ókilderi enip otyr.
Komıssııa múshesi, Qazaqstan Jazýshylar odaǵynyń tóraǵasy N.Orazalın Qazaqstan Respýblıkasynyń Prezıdenti N.Nazarbaevtyń «Bolashaqqa baǵdar: rýhanı jańǵyrý» maqalasynyń táýelsiz Qazaq eliniń 25 jyldaǵy jetken jetistikteriniń toǵysqan tusynda halyqtyń kútken qujaty bolǵanyn tilge tıek etti.
Elbasynyń bul ıdeıasy qazir shyn maǵynasyndaǵy ulttyń pasportyn anyqtaıtyn uǵymǵa aınalǵanyn atap ótken ol: «Ulttyq pasport – bizdiń mádenıetimiz, ulttyq pasport – bizdiń tilimizdiń tutastyǵy, ulttyń biregeıligi», dep basa aıtty.
Osy rette N.Orazalın «Ulttyq aýdarma bıýrosyna» qatysty da óz usynysyn bildirip, bul qurylymnyń Qazaqstannyń, ulttyń mádenı-rýhanı, ádebı jádigerlerin shetelde nasıhattaýda róli de, mańyzy da zor bolatynyn aıtty.
Sondaı-aq, ol: «Ulttyq komıssııa jumysyn halyqqa túsindirip, nasıhattaýda zııaly qaýymdy, sonyń ishinde qalamgerlerdi jappaı tartýymyz kerek dep oılaımyn. Mundaı tájirıbe buryn da bolǵan, rýhanı jańǵyrý baǵdarlamasyn iske asyrýda bul tájirıbeniń yqpaly zor bolatyny sózsiz», dep sózin túıindedi.
Al Komıssııa múshesi, Aqtóbe oblysynyń ákimi B.Saparbaev óz sózinde bylaı dedi: «Jergilikti jerlerde, óńirlerde Memleket basshysynyń «Bolashaqqa baǵdar: rýhanı jańǵyrý» atty maqalasy qyzý talqylanyp, qoldaý taýyp jatyr. Halyq bul bastamany saıası-ekonomıkalyq jańǵyrýlardyń zańdy jalǵasy dep qabyldaýda».
Sonymen qatar, B.Saparbaev «Qazaqstannyń jańa 100 tulǵasy» jobasyna da qatysty pikirin bildirdi. Jergilikti jerlerdegi, óńirlerdegi ataqty, tanymal tulǵalar respýblıkalyq, memlekettik deńgeıde nasıhattalsa degen oıyn aıtty. Sondaı-aq, ol «Týǵan jer» jobasyna toqtalyp, Aqtóbe oblysynda iske asyrylyp jatqan ekonomıkalyq-áleýmettik jobalardyń basy-qasynda otandyq kásiporyndardyń, jergilikti azamattardyń turǵanyn atap ótti.
Ulttyq komıssııa otyrysynyń barysynda, jumys toptarynyń jetekshileri ataldy.
Memlekettik tildi latyn qarpine kóshirý jónindegi jumys tobyn Til bilimi ınstıtýtynyń dırektory E.Qajybek; «Jańa gýmanıtarlyq bilim. Qazaq tilindegi 100 jańa oqýlyq» jobasy boıynsha jumys tobyn Bilim jáne ǵylym mınıstri E.Saǵadıev pen «Wikibilim» qoǵamdyq qory qamqorshylar keńesiniń tóraǵasy R.Kenjehanuly; «Týǵan jer» jobasy boıynsha jumys tobyn Prezıdent Ákimshiligi Basshysynyń orynbasary O.Orazalın men Eýrazııa ulttyq ýnıversıtetiniń rektory E.Sydyqov; «Qazaqstannyń kıeli jerleriniń geografııasy» jobasy boıynsha jumys tobyn Mádenıet jáne sport mınıstri A.Muhamedıuly men Tarıh jáne etnologııa ınstıtýtynyń dırektory H.Ábjanov; «Jahandaǵy zamanaýı qazaqstandyq mádenıet» jobasy boıynsha jumys tobyn Prezıdent Ákimshiligi Ishki saıasat bóliminiń meńgerýshisi A.Balaeva men Syrtqy ister mınıstri Q.Ábdirahmanov; «Qazaqstannyń 100 jańa tulǵasy» jobasy boıynsha jumys tobyn QHA Hatshylyǵynyń meńgerýshisi D.Myńbaı men Aqparat jáne kommýnıkasııalar mınıstri D.Abaev basqaratyn boldy.
Endi árbir jumys toby bir aılyq merzimde qajetti resýrstyq qamtamasyz etýdi eskere otyryp, ózderiniń is-qımyl algorıtmin usynady. Buǵan qosa, Qoǵamdyq sanany jańǵyrtý baǵdarlamasyn iske asyrý jónindegi is-sharalar jospary men Komıssııa jumysyn reglamentteıtin Ulttyq komıssııa týraly ereje qaraldy.
Ulttyq komıssııa tóraǵasy jumys toptarynyń jetekshilerine óz jumystaryna aldyńǵy qatarly sarapshylardy tartýdy tapsyrdy. «Sondaı-aq, saıası partııalardy, «Atameken» ulttyq kásipkerler palatasyn, sarapshylar men ǵalymdardy bul úderiske belsendi qatysýǵa shaqyramyn. Komıssııa Qazaqstannyń barlyq azamattarynyń usynystaryn qaraýǵa daıyn», dedi Á.Jaqsybekov.