Ulttyq kitaphana ujymy kúni keshe Naýryz meıramyn atap ótti. Arnaıy is-sharaǵa elimizdiń zııaly qaýym ókilderimen qatar, Kýveıt elinen kelgen delegasııa, International Women’s Group uıymynyń qadirli qonaqtary, arab eliniń tabysty ári isker áıelderi qatysty. Qadirli qonaqtar arasynda «SOS balalar qalashyǵymen» memorandýmǵa qol qoıý jáne Qazaqstanmen qarym-qatynasty nyǵaıtýdy maqsat tutyp kelgen Help4Love qaıyrymdylyq qorynyń prezıdenti, arab elderinde qaıyrymdylyq jumystarymen tanymal bolǵan Kýveıt týmasy, «Izgi nıet elshisi» atanǵan doktor Ahmad ál-Maskatı de boldy.
Alystan at arytyp kelgen kýveıttik meımandar N.Dáýletova atyndaǵy zalda arnaıy uıymdastyrylǵan kórmeden kitaphana qorynda saqtaýly turǵan kóne Quran kitaptardy, arab tilindegi qoljazba muralardy kórip, kitaphana ujymyna rızashylyqtaryn bildirip, qazaq eline degen rııasyz alǵystaryn jetkizdi.
Kýveıtten kelgen delegasııa keńesshisi Narjes ál-Iýsefı tilshilerge bergen suhbatynda: «Bizdi qazaqstandyqtar asqan qonaqjaılylyqpen qarsy aldy. Almaty qalasynyń sulý tabıǵatyna qatty qyzyqtyq. Ulttyq kitaphanada ótip jatqan Naýryz meıramynan qazaq halqynyń salt-dástúrimen, ulttyq taǵamdarymen tanysyp shyqtyq. Aldaǵy ýaqytta da Qazaqstan mádenıetimen, órkenıetimen jaqyn tanyssaq, qazaq eliniń álemge tanylýyna biz de úles qosa júrsek deımiz. Sebebi, Qazaqstan sııaqty óte kórkem, qonaqjaı eldi, onyń sulý tabıǵatyn búkil álem bilýi, kórýi tıis dep oılaımyn. Keleshekte áıel kásipkerlerdiń qaýymdastyqtarymen yntymaqtastyq ornatýǵa tyrysamyz. Mamyr aıynda Kýveıtte ótetin Halyqaralyq ulttyq kıimder kórmesinen Qazaqstan delegasııasyn da kórgimiz keledi», dedi.
Jastary altybaqan teýip, án aıtyp, bı bılep, qyz uzatý, betashar, aqyndar aıtysy syndy ulttyq salt-dástúrimizdi kórsete bilgen Ulttyq kitaphana ujymy sheteldik qonaqtarǵa arnap kıiz úıler tigip, naýryz-kójemen qatar, kóptegen ulttyq taǵam túrlerin de usynýdy umytpady.
Qazaqstannyń halyq jazýshysy, qoǵam qaıratkeri Muhtar Shahanov óz sózinde qyzyl ımperııanyń saıası qurbanyna aınalǵan mádenı muramyz – Naýryz merekesiniń 70 jyldan keıin halyqpen qaıta qaýyshýyna qatysty óz estelikterimen bólisti.
Sheteldikterge qazaq halqynyń mádenıetin, salt-dástúrin tanystyrý maqsatynda Ulttyq kitaphanada atalyp ótken Ulystyń uly kúninde Marat Omarov, Aıjan Nurmaǵambetova, Alma Amanjolova, Shahızada, Berikbol, Ardaq Isataeva, Aıbek Muhametalıev sııaqty estrada juldyzdary án aıtsa, balalar bı toptary óz ónerlerin ortaǵa salyp, qonaqtardyń rızashylyǵyna bólendi.
Mıra BAIBEK,
«Egemen Qazaqstan»
ALMATY