Ádette, mektep oqýshylarynyń respýblıkalyq olımpıadasy bes satydan turady. Tórt myńnan astam jetkinshektiń arasynan iriktelgen 600 oqýshy olımpıadanyń Qostanaıda ótken qorytyndy satysyna shaqyryldy. Onyń arasynda elýge tarta oqýshy Qostanaı óńirinen qatysty. Olımpıadanyń ashylý saltanatynda daryndy oqýshylardy oblys ákimi Sergeı Kýlagın quttyqtady. Osy arada bir aıta ketetin jaıt, balalardy mektepke deıingi mekemelerge qamtý jóninen elimizde Qostanaı oblysynyń aldyna áli eshkim túsken joq. Sonymen qatar, mektepter men balabaqshalardyń 80 paıyzyna jóndeý jumysy júrgizildi. Osy oqý jylynyń basynan bastap oblys óńirinde «Daryn» ıntellektýaldyq marafony bastaý alǵan bolatyn, onyń jaqsy nátıjesi de bar.
Mektep oqýshylarynyń olımpıadasynan tamasha ǵalymdar, daryndy adamdar ósip shyqty. Máskeý memlekettik ýnıversıtetin bitirip, búginde Boston ýnıversıtetinde bilimin jalǵastyryp jatqan Rýdnyı mektebiniń túlegi Tımýr Jıentaev 2004 jyly mektep oqýshylary respýblıkalyq olımpıadasynyń jeńimpazy atanǵan edi. Tımýr olımpıada bastalar aldynda oǵan qatysýshylarmen skaıp arqyly tildesti. Árıne, mundaı úlgi talaptyń tulparyn mingen balalarǵa qanat bitireri daýsyz.
Oblys ákimi Sergeı Kýlagın aıtqandaı, olımpıadanyń sońǵy satysyna jetýdiń ózi oǵan qatysyp otyrǵan ár oqýshynyń jeńisi dep esepteýge bolady. Degenmen báıgeniń aty – báıge, shapqanda júırikten júırik ozady. Respýblıkalyq mektep oqýshylary olımpıadasyndaǵy komandalyq esepte Astana qalasynan kelgen balalar birinshi oryndy jeńip aldy. Al qostanaılyq oqýshylar jınaǵan upaı sany olardy ekinshi orynǵa kóterdi. Úshinshi oryndy Pavlodardan kelgen oqýshylar enshiledi. Onyń syrtynda ár pán boıynsha bilim tereńdigin kórsetken oqýshylar jeke marapattaldy. Olardyń sany úsh júzge jetip jyǵylady.
Qostanaılyq balalar olımpıadadan 20 medal aldy. Olar orys tili men ádebıetinen, orys mektebindegi qazaq tili men ádebıetinen, qazaq tili men ádebıetten, bıologııadan, fızıkadan, ınformatıkadan, tarıhtan úzdik bilim deńgeıin kórsetti.
Názıra JÁRIMBETOVA.
Qostanaı.