Elshi dáris oqydy

Lev Gýmılev atyndaǵy Eýrazııa ulttyq ýnıversıtetinde Qazaqstandaǵy Fransııanyń Tótenshe jáne ókiletti elshisi Jan-Sharl Bertone «EO jáne EUÝ dostastyq kópiri» jobasy aıasynda «Eýropa, Fransııa jáne Qazaqstan bir-birinen ne úırene alady?» atty taqyrypta ýnıversıtet stýdentterine dáris oqydy. Esterińizge sala keteıik, jo­ba­nyń alǵashqy bólimin ótken jyl­dyń 24 qarashasy kúni Qazaqstan Respýblıkasyndaǵy Eýroodaq elshisi Norber Jýsten myrza bastap bergen bolatyn. Búginge deıin Latvııa, Slovakııa, Gresııa, Ispanııa, Germanııa, Fınlıandııa, Vengrııa, Ulybrıtanııa, Rýmynııa, Lıtva jáne Chehııa memleket­teriniń elshileri elimizde dáris oqyp, ony dástúrge aınaldyryp keledi. Bul úrdis 2008 jyly Qazaq­stan men Fransııa arasyndaǵy strategııalyq kelisim jónindegi hattamaǵa qol qoıǵannan beri jalǵasyp keledi. Sodan beri eki el arasyndaǵy ekonomıkalyq, saıa­sı, bilim berý salalaryndaǵy áriptestik baılanystyń jibi úzilmegen. Bul eń aldymen, Prezıdent Nursultan Nazarbaevtyń syndarly saıasaty men kóregen­diginiń arqasy ekendigin atap ótken Fransııa elshisi Jan-Sharl Bertone dáris barysynda áriptestik bolǵan jerde basqarý­shy men baǵynýshynyń bolmaýy kerektigin, mundaı mańyzdy qa­rym-qatysta aǵaly-inili degen uǵym­nyń ornyna, tepe-teńdik za­ńy saqtalý kerektigine basa nazar aýdardy. Sondaı-aq, ol: «Qazaq­stan óz táýelsizdigin alǵanyna 20 jyl ǵana bolsa da, ózge damyǵan elderge úlgi bolarlyqtaı batyl qadamdar jasaı bildi. Bul rette Eýroodaq osy kezeńge deıin jetken jetistikterinde qalyp qoımaı, ary qaraı jańa damý jolyna túsýi qajet dep esepteımin», – dedi elshi Jan-Sharl Bertone. Qazaqstandaǵy Fransııa elshi­si­niń dárisin tyńdaǵan stýdentter óz saýaldaryna tushymdy jaýap aldy. Jastar úkimetiniń belsendi stýdentteri elshi Jan-Sharl Bertone myrzaǵa ýnıver­sıtettiń atynan estelik syılyq tabys etti. Aldaǵy ýaqytta «EO jáne EUÝ dostastyq kópiri» atty jo­baǵa qatysýǵa Shvesııa, Italııa, Nıderlandy, Belgııa, Polsha memleketteriniń elshileri nıetterin bildirip otyr. Eýroodaq memleketteriniń túrli salalary boıynsha oqıtyn mártebeli elshi­lerdiń dáristeri bıylǵy oqý jy­lynyń sońyna deıin jalǵaspaq. Juldyz BAIDILDA.