Birine-biri silteıdi

«Kók bazardaǵy» ózin-ózi ju­myspen qamtamasyz etip otyrǵan 3500 adamnyń amanatyn arqalap, barmaǵan jerimiz, ashpaǵan esigimiz qalmady. Sodan keıin el gazeti «Egemenge» júginýge májbúr bo­lyp otyrmyz. Memleket basshy­sy­nyń tapsyrmasyna sáıkes sheneýnikter orta tap ókil­deriniń sanyn arttyrýǵa úles qosa ma desek bizder úlken prob­lemaǵa tap boldyq. «Kók bazar» búginde Astananyń halqyn, bala-baqshasyn, jetimder úı­lerin, dúkenderi men ashana­la­ryn arzan azyq-túlikpen, halal etpen qamtamasyz etip otyrǵan iri saýda orny bolyp tabylady. Osy ara­da atap aıtpaǵymyz – mamyr aıy­nyń 12-sinen bastap «Kók bazar» ǵımarattary elektr júıe­sinen ajyratyldy. Jónin surasaq, «Eńbek-Aqmola» respýblıkalyq mem­lekettik kásiporny basshysy­nyń tapsyrmasy boıynsha óshirdik deıdi. Bizdiń sharýashylyq 2007 jy­ly «Ámbebap saýda bazary» bolyp paıdalanýǵa tapsyryl­ǵan. Qurylys kezinde «Astana qalalyq elektr júıesi» kommý­naldyq memlekettik kásiporny bergen «tehýslovııa» talapta­ry­na sáıkes «Eńbek-Aqmola» RMK menshigindegi transformatorlyq podstansaǵa ondaǵan mln. teń­gege elektr júıesin tartyp qo­sylǵanbyz. Shart boıynsha tu­tynǵan elektr qýatyna memleket belgilengen tarıfpen aqsha­syn ýaqytynda «Astana­ener­gos­byt» kásipornyna tólep oty­ramyz. Paıdalanǵan trans­for­matorlyq podstansa úshin «Eń­bek-Aqmola» kásipornyna ár tu­tynǵan kılovatqa qosymsha 57 tıyn taǵy tólep kelemiz. Eke­ýiniń aldynda da «Kók bazar» menshik ıesi «Nurbe­re­ke-555» seriktestiginiń qaryzy joq jáne bolǵan emes. Soǵan qaramastan, zańdy, sondaı-aq sharttyq mindettemeler belinen basylyp, bazar jaryqsyz qal­dy­rylyp otyr. Búgingi kúni tońazytqyshtar istemeıtindikten, tonna-tonna az­yq-túlik taýarlary búlinip, qoqysqa aınalýda, tóleıtin nesıelerimiz ósip, kredıtor­lary­myzdyń aldynda belshemizden shyǵynǵa batýdamyz. «Eńbek-Aqmola» kásiporny bolsa, menshigindegi transfor­ma­torlyq podstansany «Astana qalalyq elektr júıesi» ká­sip­orny qabyldap alsyn dep talap qoıýda. Al sońǵysy 50 mln. teń­geniń jóndeý jumysy bar, son­dyqtan qabyldamaımyz degen sheshimge kelgen. Osylaısha sa­tý­shylar men satyp alýshylar eshbir jazyqsyz japa shegýdemiz. «Nur Otan» HDP-nyń Astana qalalyq fılıalyna baryp edik, túsinistik tanytpady, al­daý­syratyp qana shyǵaryp sal­dy. Qoly jumystan kús bolyp, arqasy aýyrtpalyqtan eńkeıgen adamdarǵa kúl bolmasań, búl bol degendeı kózqaras tanytýǵa bola ma? Bazarǵa kelip alyp, baǵa kó­termeńder deıtinder bul sharýa bizdiń máselemiz emes dep shyq­ty. «Nur Otan» HDP-nyń Or­talyq apparatyna bardyq, onda bizdi qarsy alǵan «Nur Otan» HDP Ortalyq apparaty Qo­ǵam­dyq qabyldaý bólmesiniń meń­ge­rýshisi Jumajan Júkenov, oba­ly ne kerek, qolynan kelgenshe jan-jaqqa habarlasty, biraq onysynan esh nátıje shyqpady. Biz budan keıin Astana ákim­digine bardyq, onda ákimniń or­ynbasary Vasılıı Krylov jergilikti bıýdjetten bóletin aq­shamyz joq, ózderiń 90 mln. teńge tóleńder, sonda «Astana qalalyq elektr júıesi» kásip­ornynyń basshysy tartyp beretinin aıtty, dedi.  Ár tıyndy eseptep paıda­lanyp otyrǵan bizderde ondaı mol aqsha qaıdan bolsyn?! Osy máselemen bizder Ádi­let mınıstriniń orynbasary A.Amanbaevtyń jeke qabyl­da­ýy­na jazylyp bardyq. Mán-jaıdy túsindirdik, ol KÝIS tóraǵasynyń mindetin atqarýshy M.Shabaqbaevqa jiberdi, óz kezeginde ol «Eńbek-Aqmola» ká­sip­ornyna siltedi. Onyń bas­shy­sy birese Almaty aýdanynyń ákimi S.Ahmetov ruqsat etpeıdi dese, birde qala basshylary qarsy ekenin aıtyp jaltardy. Amaldary taýsylǵan bazar jumysshylary kósheni japty. Teledıdardan muń-muqta­jy­myz­dy jetkizdik. Biraq bizdiń zarymyzǵa, bizge jasalyp otyr­ǵan qııanatqa eshkim nazar aýdarar emes... Erbol ASANOV, ámbebap «Kók bazar» bazary ákimshiliginiń basshysy.