Jyl saıynǵy Joldaýlarynda Elbasy Nursultan Nazarbaev qoǵam men ultty tıimdi damytýdaǵy áleýmettik ınstıtýt retinde medısınanyń mán-mańyzyn erekshe atap kórsetkeni belgili. Ult kóshbasshysynyń: «Biz aýrýdyń aldyn alýǵa jáne alǵashqy medısınalyq-sanıtarlyq kómek sapasyn arttyrýǵa durystap kirisýge tıispiz» degen sózderinde úlken mán jatyr.
Memleket basshysynyń osynaý qamqor sózderin biz qýana qabyl aldyq. Soǵan oraı ózimizdiń bıznestegi áleýmettik jaýapkershiligimizdi sezine otyryp, Gúlzıra Tleýimbetova ekeýmiz Talǵar qalasyndaǵy ortalyq aýdandyq aýrýhanada áleýmettik dárihana ashýǵa nıettenip, osy oraıdaǵy alǵashqy qadamdardy jasap jatyrmyz.
Áleýmettik dárihanalardyń qajettiligi qazirde, bizdiń paıymdaýymyzsha, aıdan anyq. О́ıtkeni, ondaǵy kúndelikti suranystaǵy dári-dármekter baǵasy jalpy naryqtaǵydan áldeqaıda tómen. Halyqtyń áleýmettik turǵydan álsiz toptary qajet dári-dármekterdi naq osyndaı dárihanalardan alyp jatsa, nur ústine nur emes pe. Álemdik tájirıbe osyndaı bastamalardyń bıznestiń, memleket pen qoǵamnyń ózara senimin ornatyp, yntymaqtasýyna kómektesetinin, ultty saýyqtyryp salamattandyrýǵa septigin tıgizetinin kórsetip berýde.
О́z tarapymyzdan biz osyndaı dárihanany ashyp, onyń úzilissiz de sapaly jumysyn qamtamasyz etýge ázirmiz. Ondaǵy dári-dármek suranysqa ábden saı kelip, baǵasy qoljetimdi bolmaq. Ásirese, mundaı dárihanany Talǵarda ashýymyz týǵan qalamyzǵa tartqan syıymyz bolar edi. Bul jumysty jerine jetkizip atqarýǵa osy salada buǵan deıin jınaǵan tájirıbemiz, bilim-biligimiz jetkilikti. Olaı bolsa, bul izgilikti bastamamyzdy halyqtyń qalyń toptary qýana qarsy alady, sondaı-aq jergilikti bılik ókilderi de túsinistik tanytyp, qoldaıdy dep úmittenemiz.
Ásel BAITÚKENOVA, jeke kásipker.
Almaty oblysy,
Talǵar qalasy.