Qazaqtyń «Áke kórgen oq jonar» degen sóziniń rastyǵyna mektep oqýshysy Erǵalı Nurǵalıulynyń kólik qurastyrǵanyn bilgende ılana túsesiz. Onyń atasy Ǵılaj qarııa da bir kezderi keńshardyń «K-700» atalatyn alyp traktoryn júrgizgen. Tehnıkanyń tilin ákesi Nurǵalı da jetik biledi. Ol «KamAZ» júrgizýmen shektelmeı, birneshe kólikti urshyqsha úıiredi, deıdi aýyldastary.
Aýlasynan tehnıka úzilmeıtin otbasynda tárbıelengen Erǵalıdyń tehnıkaǵa áýestigi bala kezinen baıqalypty. Ol qazir shaǵyn bolsa da jeke kóligin qurastyrdy. Ázirge eki adamǵa arnalǵan.
– Áýeli qańqasyn qurastyrýǵa tórt qyrly temirdi paıdalandym. Sodan soń «IJ» motosıkliniń motoryn ornattym, – deıdi Erǵalı Nurǵalıuly. – Berilis qorabyna «Jıgýlıdiń» tetigin qoldandym.
Erǵalı Nurǵalıuly qazir Isataı aýdanyndaǵy J.Myrzaǵalıev atyndaǵy orta mekteptiń 11-synybynda oqıdy. «Jas ulan» uıymy men «Jas tehnık» úıirmesiniń belsendi múshesi. Talapty oqýshynyń eski jabdyqtar arqyly qurastyrylǵan kóligi áli de jetildirýdi qajet etetin bolar. Degenmen, onyń yntasy aýyldastaryn qýantyp otyr.
Joldasbek ShО́PEǴUL,
«Egemen Qazaqstan»
Atyraý oblysy