Astana qalasynyń halyqaralyq áýejaıynda ornalasqan shekara baqylaý-ótkizý beketiniń shekarashylary 32 suńqardy zańsyz jolmen áketýge tyrysqandardy ustady.
Naqtyraq aıtqanda, «Astana – Sharjy» baǵytymen ushqaly turǵan G9-252 reısine júk tıeý jumystary júrgizilip jatqan kezde shekarashylardyń nazaryn qomaqty 4 sómke eriksiz aýdardy. Ol sómkelerdiń tirkeý «japsyrmalarynyń» (bırka) joq ekendigi baıqaldy. Shekarashylar sómkelerdi ashyp, tekserý kerektigin talap etti. Al tekserý kezinde sómkelerden bir emes baqandaı 32 suńqar shyǵa kelgende, turǵandardyń tańdanysynda shek bolmady. Qazirgi baǵamen olardyń ortasha qunyn eseptegende artyq-kemi joq 380 000 000 teńgeden asyp jyǵyldy. Atalǵan jyrtqysh qustar álemde sırek kezdesedi, dep habarlady UQK ShQ baspasóz qyzmeti.