Memlekettik til mereılene tústi

Qostanaıda «25 juldyzdy kún» aksııasy sheńberinde «Memlekettik til –qoǵam birliginiń jáne memlekettilikti biriktirýdiń bas­ty faktory» atty dóńgelek ústel májilisi ótti. Onda oblystyq tilderdi damytý basqarmasynyń basshysy Janbolat Úmbetov sóılep, bir kezderi óńirde tabaldyryqtan qarap qalǵan ana tilimizdiń búginde qaıta órkendeýi Táýelsizdiktiń arqasy ekenin aıtty. Eń aldymen qazaq tili memlekettik tilge aınaldy. Oblys óńirindegi aýdan, qalalardyń barlyǵynda qazaq tilinde bilim beretin mektepter jumys isteıdi. Bir Rýdnyıdyń ózinde úsh qazaq mektebi bar. Oblysta memlekettik til­diń óris­teýi úshin til úırený or­­talyqtary ashylǵan. Ondaı or­talyqtardyń sany búginde 18-ge jetken. Onda qazaq tilimen qatar aǵylshyn tili, ulttyq-mádenı ortalyqtardyń tilegimen nemis, ýkraın, koreı, tatar, ázerbaıjan tilderi oqytylady. Oblys óńirinde memlekettik tildi úırenýge jastardyń yqy­lasy da, belsendiligi de jo­ǵary. «Abaı oqýlary», O.Bókeı atyndaǵy máner­lep oqý baı­qaýlarynyń oblystyq, respýb­lıkalyq deńgeılerine oblys­tan qatysyp, júlde alyp júrgen ózge ult ókilderi kóbeıip ke­ledi. «Til daryn» klýbynyń bel­sendileri de negizinen qazaq tilin úırenip alǵan, memlekettik tilde sóıleıtin ózge ult jastarynan turady. – Meniń qazaq tilin meńgerýime ata-anamnyń eńbegi zor. Elbasy Qazaqstannyń bolashaǵy qazaq tilin­de ekenin aıtyp keledi. Meni oqýǵa qazaq mektebine ber­geni úshin ata-anama alǵysym sheksiz, – dedi taza qazaq tilinde sóıle­gen A.Baı­tursynov atyndaǵy ýnıver­sıtettiń stýdenti Olga Tıhova. Bir qyzyǵy, oblystyń jergilikti ult sany az Fedorov, Jitiqara, Uzynkól sekildi aýdandarynda jastardyń memlekettik tildi úırenýge degen qushtarlyǵy jaqsy. Dmıtrıı Romashenko ósken Fedorov aýdanynda qazaq­tardyń sany 18 paıyz ǵa­na. Talapty jas qazaq tilin óz betimen úırenip, A.Baıtursynov atyndaǵy Qostanaı memlekettik ýnıversıtetiniń qazaq fılologııasy mamandyǵyn támamdap, qazir óziniń týǵan jerindegi qazaq mektebinde ustazdyq etedi. Mundaı mysaldar jetkilikti. Oblysta jastardyń qazaq tilinde óner kórsetetin KVN koman­dala­rynyń sany júzge jetip jy­ǵylady eken. Jastardyń tilge degen yqy­lasy men jumysynan mem­le­kettik til mereılene túskendeı jáne onyń jarqyn bolashaǵy da kóringendeı bolady. Názıra JÁRIMBETOVA, «Egemen Qazaqstan» QOSTANAI