Tuǵyrly eldiń jetistikter kórmesi

Qazaqstan Respýblıkasynyń Tuńǵysh Prezıdenti – Elbasynyń kitaphanasynda Tuńǵysh Prezıdent kúnine jáne el Táýelsizdiginiń 25 jyldyǵyna arnalǵan kórmelerdiń ashylý rásimi ótti.  Oǵan Memlekettik hatshy  Gúlshara Ábdiqalyqova,  Qazaqstan Respýblıkasy Prezıdenti Keńsesiniń bastyǵy, Qazaqstan Respýblıkasynyń Tuńǵysh Prezıdenti – Elbasynyń kitaphanasy dırektorynyń mindetin atqarýshy Mahmut Qasymbekov,  Parlament depýtattary, saıası jáne qoǵam qaıratkerleri, memlekettik organdardyń  ókilderi qatysty. Jıynda sóz alǵan Memle­kettik hatshy G.Ábdiqalyqova: «Tá­ýel­sizdik jolynyń shırek ǵasyrlyq belesinde eli­miz álemdik qoǵamdastyqta eko­no­mı­kasy damyǵan, qazirgi zaman­ǵy órkenıetti memleket retin­de qalyptasty. Elbasy Nursultan Nazarbaev belgilegen «Qa­zaqstan jolyn» birlik pen turaqtylyqtyń aıshyqty úlgisi retinde tórtkúl dúnıe moıyndady. Kópetnosty halqymyzdyń birligi men yntymaǵy arqasynda eldiń táýelsizdik tuǵyry bekidi. Búgin­de terezesi teń, keregesi keń táýel­siz Qazaqstannyń tolaıym ta­bys­tary men jetistikteri bir-biri­men tamyrlasyp jatyr»,– dedi. Gúlshara Naýshaqyzy, sonymen qatar, memlekettik mereke – Tuńǵysh Prezıdent kúni bıylǵy mereıli jyly aıryqsha mánge ıe bolyp otyrǵanyn, al atalǵan kórme Qazaqstan qoǵamy men halyqaralyq qoǵamdastyq úshin eleýli tarıhı-mádenı is-shara ekenin aıtty. Bul kúni shara qonaqtarynyń nazaryna 8 kórme usynyldy.  Máselen, «Elbasy joly» dep atalǵan kórmege 50-den astam muraǵat qujaty qoıylǵan. Olar Pre­zıdenttiń batyl bastamalarynan jáne táýelsiz eldiń da­mý tarıhynan syr shertedi. «Táýelsiz Qazaqstan – tuǵyrly el» kórmesi eldiń shırek ǵasyr ishin­de áleýmettik-ekonomıkalyq turǵyda qaryshtap damýynyń, álem tanyǵan memleket retinde qalyptasýynyń, eńseli elordany gúldendirýdiń kezeńderimen tanystyrady. Mundaǵy ekspo­zısııaǵa 50-ge jýyq fotoqujat qoıylypty. Sondaı-aq, shara­ǵa qaty­sýshylar Elbasy kitaphana­syndaǵy asa qundy 550 jınaq­pen 3 kitap kórmesi arqyly tanysty.  Ol kitap kórme­leri «N. Á. Nazarbaev – Táýel­siz Qa­zaq­stannyń negizin qa­laýshy», «Elbasyna estelikke qol­tańba», «Egemen eldiń táýel­siz­dik sheji­resi» dep atalǵan eken. Al «Álem qadirlegen Elba­sy» kórmesinen  Qazaqstan Pre­zıdentine shet memleketterdiń bergen jo­ǵary nagradalaryn kóre alasyz. Máselen, kolleksııada Uly­brıtanııa, Japonııa, Reseı, Vatı­kan, Fransııa, Aýǵanstan, Qytaı se­kildi elderdiń tarapynan usy­nylǵan 41 nagrada bar. «Uly Dala eli» dep atalǵan kórme de jurtshylyqtyń qyzy­ǵý­­shy­lyǵyn týǵyzdy. Onda Qa­zaq­stan Sýretshiler odaǵynyń múshesi Nurjan Qarymsaqovtyń eldiń 25 jyldaǵy tabystary men je­tistikterin qylqalammen sóı­letken 36 týyndysy qoıylǵan. Bul kúni, sondaı-aq, «Kósh­bas­­shylyq faktory», «Parlamen­tarızm evolıýsııasy», «Bitim­ger­shilik áre­ket­terdiń jol kartasy» se­kildi fılm­derdiń kórsetilimi ótti. Láıla EDILQYZY, «Egemen Qazaqstan» Sýretti túsirgen Erlan OMAROV, «Egemen Qazaqstan»