Jýyrda Arqalyq aýmaǵyna qarasty Fýrmanov aýylynda «Baldáýren» balabaqshasy ashyldy. «Balapan» baǵdarlamasy aıasynda jańadan turǵyzylǵan eki qabatty ǵımaratta buıyrtsa, 60-qa jýyq búldirshin tárbıe almaq.
Bir-eki jyl buryn atalǵan aýylda zaman talabyna saı keletin orta mektep, otbasylyq dárigerlik ambýlatorııa, syrty men ishi ásem bezendirilgen meshit boı kótergen edi. Sonymen qatar, mádenıet úıi kúrdeli jóndeýden ótip aýyl jastaryn bir qýantyp tastaǵan. Qazirgi tańda Fýrmanov aýyly – ınfraqurylymy damyǵan eldi meken. Jańa balabaqsha da atalǵan jetistikter qatarynda jyl saıyn kórkeıip kele jatqan aýyldyń turǵyndaryn zor qýanyshqa bólep otyr. Táýelsizdiktiń 20 jyldyq mereıtoıymen tuspa-tus kelgen «Baldáýrenniń» ashylý saltanatyna halyqtyń ıin tirese kelýi osynyń aıqyn dáleli ispettes.
«El bolam deseń – besigińdi túze» degendeı, mektepke deıingi tárbıe berýdiń mańyzy zor ekeni sózsiz. Búgingi zamanda jan-jaqty ári zamanaýı jabdyqtalǵan balabaqsha bolýy ıgilikti is. Bul maqsatty qala basshylyǵy únemi nazarda ustaýda ekenin aıtqan abzal. Osy oraıda búldirshinderdiń bastapqy tárbıe alýlaryna ózderiniń úlesin qosyp jatqan shaǵyn ortalyqtarǵa toqtalǵan oryndy bolar. Y.Altynsarın atyndaǵy Arqalyq memlekettik pedagogıkalyq ınstıtýtynyń qaramaǵynda osyndaı búldirshinderge arnalǵan ortalyq ıgi iske uıytqy bolýda. Shaǵyn ortalyqtarda balabaqshadaǵy oryn tapshylyǵy máselesiniń sheshilýimen qatar, bolashaq pedagogtarǵa balalarmen jumys jasaýǵa mashyqtanýyna, mol tájirıbe alýyna zor múmkindik qarastyrylǵan.
Buryn mundaı shaǵyn ortalyq Fýrmanov aýylynda da bolǵanyn eskersek, jyl sanap demografııalyq ósimi ulǵaıyp kele jatqan aýylda qala basshylyǵy tolyq balabaqsha turǵyzýdy jón sanapty. Eki qabatty ǵımaratty balabaqshaǵa laıyqtap, kúrdeli jóndeýden ótkizý úshin qalalyq bıýdjetten 10 mıllıon teńge bólinip, qala qarajaty esebinen jańa jylý júıesi tartylǵan. Balabaqsha shtatyn qurý men onyń jalaqysyn tóleý shyǵyndaryn óteý maqsatynda respýblıkalyq bıýdjetten 5 mıllıon teńge qarjy aýdarylǵan.
Qyzǵaldaq BAZARBEK.
Qostanaı oblysy.