QR Syrtqy ister mınıstrligi Aýǵanstannyń Kabýl qalasynda bolǵan terrorlyq shabýylǵa qatysty málimdeme jasady.
Málimdemede: «Qazaqstan Qabyldaǵy «Interkontınental» qonaq úıinde beıbit halyqtyń, sondaı-aq Aýǵanstanǵa beıbit maqsatpen kelgen shetel azamattarynyń ólimine alyp kelgen terrorıstik áreketti qatań aıyptaıdy.
Atalǵan qatygez jáne óreskel áreket Aýǵanstan úshin ǵana emes, osy eldegi beıbitshilik pen damýdy qalpyna keltirýge atsalysyp jatqan barlyq halyqaralyq qaýymdastyq úshin qaýip-qaterler bolyp tabylady.
Qazaqstan Aýǵanstandaǵy terrorızm máselesin túbegeıli sheshý úshin jedel sharalar qabyldaý qajettiligin tolyq jaýapkershilikpen málimdeıdi.
Qazaqstan Aýǵanstandaǵy barlyq saıası kúshterdi ulttyq tatýlasý boıynsha kelissózder júrgizýge shaqyrady.
Qazaqstan BUU Qaýipsizdik Keńesiniń tóraǵasy retinde jáne ulttyq negizde Aýǵanstandaǵy jaǵdaıdy turaqtandyrýǵa, terrorızmdi basýǵa jáne eldi qalpyna keltirýge jan-jaqty járdem kórsetýdi jalǵastyrady.
BUU Qaýipsizdik Keńesi Tóraǵasynyń qańtarda qabyldaǵan málimdemesi halyqaralyq qaýymdastyqty osy eldegi saıası jaǵdaıdy turaqtandyrý maqsatynda Aýǵanstanǵa qoldaý kórsetýge shaqyrady.
Qaza bolǵandardyń týystary men jaqyndaryna kóńil aıtamyz, sondaı-aq jaraqat alǵandardyń tez arada saýyǵyp ketýin tileımiz», delingen.