Bul týraly Úkimettiń baspasóz ortalyǵynda ótken baspasóz konferensııasynda bilim jáne ǵylym vıse-mınıstri Ashat Aımaǵambetov málimdedi.
Eske sala keteıik, búgin QR Úkimetiniń otyrysynda bilim jáne ǵylym mınıstri Erlan Saǵadıev qyrkúıek aıynan bastap jańartylǵan bilim berý mazmunyna kóshetin 3, 6, 8 synyptarǵa oqýlyqtar satyp alý úshin 28,6 mlrd tg bólingenin aıtty. Mınıstrlik oqýlyqtardyń jetkizilýine kún saıyn monıtorıng júrgizýde.
О́z kezeginde vıse-mınıstr Ashat Aımaǵambetov BAQ ókilderiniń suraqtaryna jaýap bere otyryp, elimizde búginde oqýlyqtardy jetkizý boıynsha belsendi naýqan júrgizilip jatqanyn aıtty. Jalpy, jańa oqý jylyna daıyndyq kezindegi eń basty máselelerdiń biri — mektepterdi qajetti materıaldarmen qamtamasyz etý. Oqýlyqtardy jetkizý qarqyny jaman emes. Búgingi kúni oqýlyqtardyń 91% jetkizilgen. Osy aptanyń sońyna deıin bul kórsetkishti 100%-ǵa jetkizý kózdelgen.
Sondaı-aq, A. Aımaǵambetov Astanada oqýlyqtardy ýaqytyly jetkizbeý máselesi sheshilgenin aıtty. Bir apta ishinde munda oqýlyqtardyń 50% jetkizildi. Osy aptanyń sońyna deıin qalǵan bóligin jetkizý josparlanǵan.
Budan ózge, Bilim jáne ǵylym mınıstrliginde muǵalimder toltyrýy tıisti bes qujat anyqtalǵan.
«Bıyl Mınıstrlikte muǵalimder toltyrýy tıisti tek bes qujat anyqtalǵan buıryq qabyldandy. Bul: kúntizbelik-taqyryptyq jospar, ár sabaqtyń jospary, krıterıılik baǵalaý, kúndelik jáne synyp jýrnaly», — dedi A. Aımaǵambetov.
Sonymen qatar, vıse-mınıstr basqa qujattardy toltyrýǵa qatań tyıym salynǵanyn jáne QR BǴM buny qadaǵalaıtynyn atap ótti.
«Eger mektep dırektory, bilim berý basqarmasy basqa qujattardy toltyrýdy talap etse, Bilim jáne ǵylym mınıstrliginiń baqylaý departamentine júginýge bolady. Biz shara qabyldaımyz», — dedi A. Aımaǵambetov.