Taraz ınnovasııalyq-gýmanıtarlyq ýnıversıtetiniń «Sherhantaný» ǵylymı-zertteý ortalyǵy Memlekettik syılyqtyń ıegeri, belgili qoǵam qaıratkeri, jazýshy Sherhan Murtazanyń «Táýelsizdiktiń joly qatty, dámi tátti» dep atalatyn kitabyn oqyrmandarǵa usynyp, tusaýkeserin ótkizdi. Atalmysh oqý ornynyń baspahanasy munyń aldynda da óz stýdentterin «Qazaqtyń Sheraǵsy» degen taǵylymdy kitappen qýantqan bolatyn.
Qalalyq Mádenıet úıinde ótken tusaýkeserde stýdentter óz óleńderi men jazýshy shyǵarmalarynan úzindiler oqydy. Kezdesý barysyndaǵy ózine degen, ózi baqytty ómir súrip jatqan elgen degen yqylas pen peıilge tolqyǵan Sherhan Murtaza:
- Bizdiń ata-babalarymyz óz eli, óz jerindegi qoı ústine boztorǵaı jumyrtqalaǵan osyndaı zamandy ǵasyrlar boıy armandap, ańsap ótken. Mine, biz sol beıbit zamandy óz kózimizben kórip, tynyshtyqpen ómir súrip otyrmyz. О́z elimiz, óz basshymyz bar. Basshymyz - el tynyshtyǵynyń kepili. El erteńi – jastar sol tynyshtyqty kózderiniń qarashyǵyndaı saqtaı bilýi kerek. Talaı ǵasyrlardan keıin tabysqan táýelsizdigimizdiń turǵyry myqty bolsyn!! – dep bata berdi.
Kósemáli SÁTTIBAIULY,
Jambyl oblysy