S.Seıfýllın atyndaǵy Qazaq agrotehnıkalyq ýnıversıtetinde «Ekonomıkanyń naqty sektory úshin mamandar daıyndaýdaǵy ýnıversıtet pen jumys berýshilerdiń seriktestigi» atty respýblıkalyq forým ótti.
Sharaǵa Parlament Májilisi Tóraǵasynyń orynbasary Vıktor Bojko, «Qazaqstannyń et-sút odaǵy» Basqarma tóraǵasy Ivan Saýer, «Atameken-Agro» AQ agroholdınginiń Basqarma tóraǵasy Kıntal Islamov jáne 150-ge jýyq otandyq, sheteldik agrobıznes ókilderi qatysty. Forým barysynda básekege qabiletti, bilikti maman daıyndaý maqsatyn kózdeıtin jańa baǵdarlamalar talqylanyp, aýylǵa barǵan jas mamanǵa jaǵdaı jasaý máselesi kóterildi.
«Búgingi biz uıymdastyryp otyrǵan forýmnyń agroónerkásip salasyn damytý jolyndaǵy alar orny erekshe. Usynymyzdy qabyl alyp, basqosýǵa kelgenderińiz úshin rızashylyǵymyzdy bildiremiz. Bul saladaǵy máselelerdiń sheshim tabýy úshin aýylsharýashylyq taýar óndirýshileri men kásipkerler arasynda tyǵyz baılanys ornaýy qajet. Memlekettik bilim berý granttarynyń baǵasyn kóterý, kadrlardy tek mamandandyrylǵan oqý oryndarynda daıyndaý jáne olardyń 3 jyl aýylda eńbek etýin mindetteý máseleleri qolǵa alynýy kerek», dedi ýnıversıtet rektory Aqylbek Kúrishbaev.
Parlament Májilisi tóraǵasynyń orynbasary V.Bojko óz sózinde agrotehnıkalyq mamandyqta bilim alǵan jastardyń eńbek etý úshin aýylǵa baratyndarynyń sany tym az ekendigin aıtty. Al «Atameken-Agro» AQ agroholdınginiń Basqarma tóraǵasy Kıntal Islamov pen «Kartop ósirý jáne kókónis daqyldary odaǵy» Prezıdenti Qaırat Bıstaev aldaǵy ýaqytta stýdentterdi odaqpen birlesip jumys isteýge shaqyrdy.
Forým qatysýshylary men qonaqtar stýdentterdiń teorııalyq bilimin tájirıbe júzinde shyńdaýyna múmkindik beretin óndiris alańdaryn aralap, stýdentter daıyndaǵan sút, et, nan ónimderinen dám tatty.
Qarlyǵash QURAMYS