2018 jyldyń 1 qarashasynan bastap, vestern janrynda túsirilgen «Satash» fılmi otandyq prokatqa shyǵady. Fılmniń rejısseri de, ssenarııin jazǵan da belgili jýrnalıst Tólegen Baıtókenov.
Tólegen «Satash» fılmin kezdeısoq túsirilmegen. Uzaq ýaqyt ishki daıyndyqpen kelgenin aıtady. Tólegenniń ózi Qazaqstan kınosynshylar qaýymdastyǵynyń múshesi, «Turan» ýnıversıteti kıno óneri kafedrasynyń aǵa-oqytýshysy, «Altyn adam» ulttyq baıqaýynyń «Úzdik jýrnalıst» júldesiniń laýreaty.
Sh.Aımanov atyndaǵy «Qazaqfılm» kınostýdııasy QR Mádenıet jáne sport mınıstrliginiń tapsyrysy boıynsha túsirilgen «Satash» kartınasy qylmyskerlermen shaıqasqa túsken aýyldyń Satash esimdi ýchaskelik polıseıi týraly baıandaıdy. Satash – adal polıseı. Ol aýyldy basyp alǵan qylmyskerlerge jalǵyz ózi tótep berip, qyzmettik boryshyna qylaý túsirmeı, turǵyndarǵa tyrnaǵy batqandarmen bir ózi shaıqasady. Fılmdegi basty rólderdi Aqylhan Almasov, Dına Tasbolatova, Shyńǵys Kapın jáne Erjan Núsipaqynov jas akterler oınaıdy. Urys sahnalaryn Bahadyr Jalmetov pen «Jal» kaskaderler qaýymdastyǵy qoıǵan. Túsirilim jumysy Almaty oblysy, Qapshaǵaı qalasynan 40 shaqyrymda ornalasqan «Brıgadır» aýylynda júrgizilgen.
Esterińizge sala ketsek, «Satash» fılmi jaqynda ǵana qazannyń 12-i men 21-i aralyǵynda ótken 34-Varshava kınofestıvaliniń konkýrstyq baǵdarlamasyna qatysqan bolatyn. Rejısser Tólegen Baıtókenovtiń aıtýynsha, fılmdi tamashalaǵan polshalyq kórermender men túrli elden kelgen BAQ ókilderi kartınanyń unaǵanyn aıtyp, jyly lebizderin bildirgen. Mysaly, SLANT Magazine atty amerıkalyq tanymal basylymynyń kınosynshysy Chak Boen festıval barysynda «Satash» fılmi týraly:
Atalǵan kınotýyndy ásemdiligimen erekshelenedi. Fılmde bári úılesimdi, ár kadrlary oryndy, aıyryqsha kınoahýal seziledi, oqıǵa jelisi de qyzyqty. Fılmniń sońy da oıdaǵydaı aıaqtalady, ár kompozısııasy este qalarlyq. Bul – naǵyz zamanaýı vestern,– degen eken.
Aıgúl AHANBAIQYZY,
«Egemen Qazaqstan»
ALMATY