Erejesiz jekpe-jekten túrli halyqaralyq jarystarda júlde alyp júrgen qazaq sportshysy Qaırat Ahmetov asa jeńil salmaqtaǵy UFC-diń eks-chempıony, amerıkalyq Demetrıýs Djonsonmen judyryqtasqysy keletinin málimdep, óziniń bul ótinishin ol ONE ǴS uıymynyń basshylaryna joldady.
О́ziniń ár jeńisinen keıin «Qara jorǵany» naqyshyna keltirip bıleıtin 31 jastaǵy Qaırat Ahmetovty jankúıerler jaqsy biledi. «Qazaq» degen búrkenshik esimmen tanymal qandasymyz «Alash Praıd» klýbynyń qataryna qosylyp, 2010 jyldan beri kásipqoılar arasynda baq synap júr. Alǵashqy jeti jylda ol birde-bir ret jeńilgen joq edi. Tipten, 2015 jyldyń 21 qarashasynda brazılııalyq Adrıano Moraesti utyp, ONE ǴS uıymynyń chempıondyq belbeýin ıelendi. Basqa da halyqaralyq jarystarda Ahmetov aıqyn jeńisterge qol jetkizdi.
Alǵash ret Qaırat 2017 jyldyń 5 tamyzynda dál sol Adrıano Moraesten qarymta kezdesýde jeńildi. 2018 jyly 26 aqpanynda fılıpındik Djehe Eýstakıoǵa ese jiberdi. Eki retinde de qandasymyz upaı sanymen ǵana utyldy. Osydan bir aıdan asa ýaqyt buryn ótkizgen óziniń sońǵy jekpe-jeginde qazaq sportshysy qytaılyq Ma Hao Bınnen basym tústi. Barlyǵy ol 20 kezdesý ótkizip, 18 ret jeńiske jetti. 11 qarsylasyn aıqyn utty.
Qaırat Ahmetovke qarsylas atanýy múmkin Demetrıýs Djonson 32 jasta. AQSh-tyń Kentýkkı shtatynnyń týmasynyń kúni búginge deıin baǵyndyrmaǵan belesi joq. 2012 jyldyń kúzinde UFS uıymynyń chempıondyq belbeýin ıelengennen soń ol sol ataǵyn 11 márte sátti qorǵady. Bul – rekordtyq kórsetkish! Ústimizdegi jyldyń 4 tamyzynda óz otandasy Genrı Sehýdodan upaı sanymen utylyp, altyn belbeýden aıyryldy. «Qýatty tyshqan» degen búrkenshik esimmen tanylǵan Djonson barlyǵy 31 kezdesý ótkizip, 27 ret jeńiske jetti. 15 jekpe-jegin merziminen buryn aıaqtady. Úsh ret utylyp, bir básekede teń esep tirkeldi.
Demetrıýs Djonsonnyń ONE ǴS uıymyna aýysatynyn estip qatty qýandym. Tipten, shattandym dese de bolady. Ol erejesiz jekpe-jekte ǵana emes, kúlli sport áleminde túbegeıli moıyndalǵan tulǵa. Dál osyndaı deńgeıi asa joǵary, aty ańyzǵa aınalǵan sportshymen aıqasý meniń kópten bergi armanym edi, – deıdi Qaırat Ahmetov.
Rasynda da, bul bir keremet aıqas bolatyn edi. Ásirese, qazaq jankúıerleriniń erekshe shattanatyny anyq. О́ıtkeni, erejesiz jekpe-jekti serik etetin jigitterimizdiń deni kóbine-kóp deńgeıi tómen nemese ortań qol sportshylarmen aıqasyp júrgeni jasyryn emes. Ondaı «usqynsyz kórinister» jankúıerlerdi de jalyqtyrdy. Olaı bolsa, Qaırat Ahmetovke aq jol tileıik. Qandasymyzdyń jospary júzege asyp, Demetrıýs Djonsonmen aıqas alańynda jolyqsyn!
Ǵalym SÚLEIMEN,
«Egemen Qazaqstan