Erejesiz jekpe-jektegi eń beldi uıym – UFC-degi óziniń tusaýkesker kezdesýin Orynborda týyp-ósken qazaqtyń ulany Damır Ismaǵulov avstralııalyq Djozef Daffımen ótkizýge tıis edi.
Alaıda jaraqat alýyna baılanysty Djozef Daffı aıqas alańyna shyǵýdan bas tartty. Sodan UFC basshylyǵy 1 jeltoqsanda Avstralııanyń Adelaıda qalasynda ótetin jarysqa tyńǵylyqty daıarlanǵan qandasymyzǵa ózge qarsylas izdeýge dereý kiristi. Mine, endi búgin jeńil salmaqtaǵy Damır Ismaǵulovtyń kimmen kúsh synasatyny belgili boldy. Qazaqtyń uly osy kúnge deıin jeti jekpe-jek ótkizip, barlyǵynda jeńiske jetken 23 jastaǵy jergilikti sportshy Aleks Gordjespen aıqasady.
Al 27 jastaǵy Damır osy kúnge deıin 18 márte aıqas alańyna shyǵyp, 16 ret jeńis toıyn toılady. Ol M-1 nusqasy boıynsha talaı dúbirli dodada óziniń myqtylyǵyn moıyndatyp, chempıondyq ataqty ıelendi. Osy uıymdaǵy beldi belesterdiń barlyǵyn baǵyndyrǵannan keıin ol UFC-de baq synaýǵa bel býdy.
Ǵalym SÚLEIMEN,
«Egemen Qazaqstan»