Aqtóbede Qazaqstan Respýblıkasynyń Táýelsizdigi kúnine arnalǵan «Táýelsiz eldiń shattyǵy» atty saltanatty shara ótti. Oǵan ardagerler, qoǵam, úkimettik emes uıymdardyń, partııalar men memlekettik mekemelerdiń ókilderi qatysty.
Atalmysh sharaǵa jınalǵan jurtshylyqty oblys ákimi Berdibek Saparbaev quttyqtady.
«Táýelsizdik kúni – elimizdiń eń basty merekesi. Biz, aǵa urpaq, táýelsizdik qarsańynda elimizdiń ekonomıkasynyń, syrtqy baılanystarynyń qandaı jaǵdaıda bolǵanyn jaqsy bilemiz. Osyndaı qıyn kezeńderde Nursultan Ábishuly Nazarbaev sekildi naǵyz kóshbasshy kerek boldy. Osynsha qysqa merzim ishinde Elbasynyń dana basshylyǵymen Qazaqstan tıimdi jumys jasaıtyn ekonomıkalyq júıeni qurdy, álemniń básekege qabiletti 50 eliniń qataryna endi jáne damyǵan 30 eldiń qatarynda bolýǵa umtylýda. Eń bastysy - bizdiń elimizde álemdik qoǵamdastyqta laıyqty oryn alatyn turaqtylyq pen ultaralyq kelisim bar», dedi Berdibek Saparbaev.
О́ńir basshysy oblystyń 72 turǵynyna memlekettik marapattardy saltanatty túrde tabys etti.
Aıta keteıik, Aqtóbe oblysynda 20 qarashada bastalǵan Táýelsizdik kúnine arnalǵan merekelik is-sharalar 17 jeltoqsanǵa deıin jalǵasady. Bul kúnderi oblys boıynsha 250 myńǵa jýyq adamdy qamtıtyn 400-den astam aýqymdy mádenı-kópshilik jáne áleýmettik mańyzy bar is-sharalar ótedi.
Sondaı - aq osy kezeńde oblys boıynsha 32 jańa óndiristik jáne áleýmettik nysandar – bes kópqabatty turǵyn úı, eldi mekenderdi gazben jáne sýmen jabdyqtaıtyn tórt nysan, ońaltý ortalyǵy, úsh medısınalyq pýnkt, bes balabaqsha, eki mektep jáne t. b. ashylady.
Aqtóbede Batys óńirdegi alǵashqy zamanaýı aqparattyq tehnologııalardy tereńdetip oqytatyn mektep-lıseıdiń ashylý saltanaty ótti. Innovasııalyq oqý ornyna qoǵam jáne saıası qaıratker, Qazaqstannyń Halyq jazýshysy Ábish Kekilbaevtyń esimi berildi. 900 oryndyq IT-mektep-lıseıiniń qurylysyna, abattandyrýy men jabdyqtaýǵa shamamen 1,6 mlrd.teńge jumsaldy. 1-7-shi synyp oqýshylary aqparattyq tehnologııalar negizderin zertteıtin bolady, al 7-shi synyptan bastap oqý baǵdarlamasyna baǵdarlamalaý tilderiniń arnaıy kýrstary, robot tehnıkasy men 3D-prıntıngti tereńdetip oqytý engiziledi.
Temir Qusaıyn,
«Egemen Qazaqstan»