«Kók týdyń jelbiregeni» ánimen halyqqa tanylǵan ánshi, Qazaqstannyń alǵashqy Densaýlyq elshisi Ibragım Eskendir Máskeýde ótken kásipqoı boks keshinde qarsylasyn nokaýtqa túsirip, TMD chempıony atandy.
15 jeltoqsan kúni Ibragım Eskendir ázirbaıjandyq Anar Abdýllaevpen sharshy alańǵa shyǵyp, 90,7 kg aýyr salmaqta Pro Box nusqasy boıynsha TMD chempıony tıtýlyna talasqan bolatyn. 10 raýndqa eseptelgen jekpe-jekte qazaqstandyq boksshy alǵashqy úsh mınýtta-aq nokaýtpen jeńiske jetti.
Elge jeńispen oralǵan kásipqoı boksshy jeńisin Táýelsizdik merekesine arnaǵanyn atap ótti.
"Táýelsizdik qarsańynda rıngke shyqqan men úshin erekshe rýh berdi. Ata-babalarymyz táýelsizdik úshin kúresken, al búgingi Qazaqstannyń urpaǵy Táýelsizdikti saqtap qalýmen kúresýimiz kerek. Ol óner, sport, ǵylym joly bolýy múmkin. Árbir qazaqtyń balasy tý kótersem dep armandaıtyn bolsa, bizdiń elimiz jaman bolmaıdy", - dedi boksshy.
Aıta ketsek, osyǵan deıin 76 kg salmaqta sharshy alańǵa shyǵyp júrgen boksshy sońǵy jekpe-jekte 90, 7 kg aýyr salmaqqa aýysty.
"Jekpe-jek óte jaqsy ótti, ózimdi erkin ustadym. О́ıtkeni meniń bapkerlerim, promoýterim Jalǵas Tókeshov, Baýyrjan Rysbekpen óte jaqsy taktıkada jattyǵýlar jasap, daıyndaldyq",- dep bapkerlerine alǵysyn bildirdi.
Án áleminde kók baıraqty jelbiretken Ibragım Eskendir sońǵy jyldary kók týymyzdy kásipqoı boksta jelbiretip júr. Bul – onyń kásipqoı mansabyndaǵy altynshy jekpe-jegi. Buǵan deıin ol 5 jekpe-jekke shyǵyp, bárinde nokaýtpen jeńiske jetken bolatyn. 2001 jyldan 2007 jylǵa deıin kásibı túrde bokspen aınalysqan ol, 2007 jyly jattyǵý barysynda aýyr jaraqat alýyna baılanysty bokstan qol úzip ketken. Alaıda, 10 jyldan soń óziniń súıikti isi, bala armany boksqa qaıta keldi.
Sonymen qatar, sońǵy ýaqytta Ibragım Eskendir Qazaqstannyń alǵashqy Densaýlyq elshisi retinde jastar arasynda salaýatty ómir saltyn, durys tamaqtaný tártibin dáriptep júr.
Aıta ketsek, qazan aıynda Densaýlyq saqtaý mınıstri Eljan Birtanov elimizdiń belgili sportshylary, ánshilerimen kezdesý ótkizip, olarǵa «Densaýlyq elshisi» ataǵyn bergen bolatyn. Olardyń qatarynda Ibragım Eskendir de bar.