Kútpegen kezdesý

Sársenbi, 28 naýryz 2012 7:15

Jazmyshtan ozmysh joq. О́zine jumaqtaı kórinetin baspanasy bir mezette tasqynnyń qurbanyna aınalyp, qabyrǵasy qaýsap qulady. Joldyhannyń júregi shańyraǵy búlingende qan jylady. Mundaıda kózden tamshy da tambaı qalady eken. Buǵan qosa kóshe boıyndaǵy kúnkórisin aıyrǵan shaǵyn dúkenin de tasqyn shaıdy. Túksiz, typ-tıpyl dalada qaldy.

Sársenbi, 28 naýryz 2012 7:15

Jazmyshtan ozmysh joq. О́zine jumaqtaı kórinetin baspanasy bir mezette tasqynnyń qurbanyna aınalyp, qabyrǵasy qaýsap qulady. Joldyhannyń júregi shańyraǵy búlingende qan jylady. Mundaıda kózden tamshy da tambaı qalady eken. Buǵan qosa kóshe boıyndaǵy kúnkórisin aıyrǵan shaǵyn dúkenin de tasqyn shaıdy. Túksiz, typ-tıpyl dalada qaldy.

Keshe ǵana qalypty ómirdegi Qy­zylaǵash aýyly da astan-kes­teń. Tabıǵattyń bul «she­shimine» ne ýáj aıtarsyń. Joldasy Serik ómir­den erte ótip, Berik pen Merekeni el qataryna qalaı qossam degen keıýana armany dármensizdikke tirelgende qar­manatyn da jeri joq bolatyn.

Joldyhan Tal­dy­qorǵandaǵy ja­qyndarynyń úıin ýaqytsha pa­na­laýǵa bel býdy. Túıinshegi men nemeresi Azatty kóterip, jolǵa shyqty. Ári-beri aǵylǵan avtokólik. Kópshiligi apattan keıingi qutqarý jumystarymen aınalyssa, endi biri ózi tárizdi týystaryna jetýge asyq­qandar. Áıteýir áýre-sarsań, dalbasalaǵan jurt seńdeı soǵylysady.

Naýryzdyń yzǵary da óńmenińnen ótedi. Oǵan kóńildegi jaısyzdyq qosylyp, ana kóńilin odan ári júdetti. Iаpyr-aý, bas saýǵalap júrgende azyn-aýlaq tıyn-tebenine de ıe bolmapty. Taldyqorǵanǵa jetsem, bir yńǵaıy bolar degen úmitpen kele jatqan avtokólikke qol kóterdi. Jyldamdyǵyn azaıtyp, biraz jerge baryp kilt toqtaǵan kólikten túsken azamat qolyndaǵy sábıin alyp, «otyryńyz» dep esikti ashty. Joldyhan ımanjúzdi jolaýshyǵa rahmetin jaýdyrǵysy keldi. Biraq, aıta almady. Azatyn baýyryna qysyp, ústindegi túnde ıyǵyna ile salǵan kónetoz úı kıimine kóz saldy. Birden ózin jaısyz sezindi. Dese de sanasy aýyr oıdan arylmady. Endi qaıtsin, bir shańyraqtyń taýqymeti eki ıyǵyn basyp tursa…

– Qaıda barasyz?..

Qara tory jigit aǵasy alǵashqy áńgimeni osylaı bastady.

– Nesin aıtasyz. Kórgen bolarsyz, túnde aýy­lymyzdy tasqyn alyp, búgin mine, dalada qaldyq, – degen ana jyly sóz, bolmashy qamqorlyqty sezingennen kóńili bosap, kóz jasyn tógip jiberdi.

– Moıymańyz. Myna oqıǵa bizdiń de ba­symyzǵa jaı túsirdi. Elbasy Nursultan Nazarbaevtan bastap, sizderdi qıyndyqtan qamyqtyrmaı alyp shyǵý úshin jumylyp jatyrmyz. Sondyqtan bári umyt bolatyn kún jaqyn. Jaqsy úıge qonystanasyzdar, – dep basý aıtqanda ol alǵash ret onyń júzine senimsizdikpen tike, tańyrqaı qarady. Teledıdardan kórip júrgen oblys ákimi Serik Úmbetov osy bolar degen oı sanasyna sap ete tústi.

– Siz kimsiz? Sirá, oblys ákimi bolarsyz?

Odan ári Joldyhannyń otbasy, tasqyn jaıly áńgime jalǵasty.

Mashına terezesin damylsyz urǵylaǵan aq jaýyn tolastar emes. Biraq, kólik ishindegi janashyrlyq ana kóńilin sál bolsa da ornyqtyrǵandaı. Oqıǵanyń aýyrtpalyǵy son­shalyqty áńgime aýany úzilip baryp qaıta jalǵanady, qııýy kelmeıdi.

Taldyqorǵanǵa da keldi. Alǵysyn aıtyp, balasyn kóterip, mashınadan túsýge yn­ǵaılanǵan Joldyhandy ákim qoltyǵynan demep, zattaryn kóteristi. Jáne sport kıiminiń qaltasynan úsh jastaǵy Azamattyń alaqanyna áldebir zatty ustatty.

– Endi qandaı másele bolmasyn, ózime habarlasyńyz. Moıymańyz, myna kishkentaı úlken azamat bolsyn, – dedi qysqa ǵana.

Dıdarǵaıyp dúnıeniń osy sáti ana úshin jaqsylyqqa jol ashqandaı boldy. Azamattyń alaqanyndaǵy alpys myń teńge jańa ǵana jolyna «soqyr» tıyn tappaǵan Joldyhanǵa Táńirdiń kókten túsirgen syıyndaı kórindi. Bul 2010 jyly 13 naýryz bolatyn.

…Biz issaparmen Qyzylaǵash aýyly, Jibek joly kóshesindegi Joldyhan Rysaldınovanyń otbasyna aıaldadyq. Ol bárimizdi eski tanysyndaı jadyraı qarsy aldy. Sosyn óziniń basynan ótken joǵarydaǵy oqıǵany qaz-qalpynda ádiptep jetkizdi.

– Mine, kásipker Bolat Nazarbaevtyń demeýshiligimen salynǵan úı. Osynyń ornynda 1955 jylǵy eski tam bar edi. Joldasym Serik ekeýmiz mal baǵyp, basqa da kásipterde bel sheshpeı júrip turǵyzǵanbyz. Árıne, onymen sa­lystyrǵanda myna úı han saraıyndaı ǵoı. Aýmaǵy 90 sharshy metr. 3 jatyn bólme, qonaq kútetin zal jáne as úıi bar. Jıhazdardy da birge berdi. Qyzyl kirpishten salynǵan, – degen Joldyhan qamqorlyqqa alǵys aıtýdan jalyq­paı osy nıetine qaıta-qaıta orala berdi.

Qazir aýyl turǵyndarynyń jumyspen qamtylýy erekshe nazarǵa alynǵan. Solardyń qatarynda Joldyhan Rysaldınova «Jol kartasy-2020» baǵdarlamasymen qomaqty qarjy alyp, dúken ashýdy josparlaǵan. Jer telimi bólinip, qujaty rásimdelgen. Endi jer degdise qurylysty bastaýǵa tastúıin daıyn.

Kúmisjan BAIJAN.

Almaty oblysy.