Seısenbi, 19 maýsym 2012 7:41
Erli-zaıypty jeńil atletshi Karpovtar Olımpıadaǵa birge barady
Tórt jylda bir aınalyp soǵatyn bul dúbirli dodanyń arǵy-bergi tarıhynda bir shańyraqtyń shamshyraqtary qoıan-qoltyqtasa jarysqa qatysýy sırek oqıǵa bolsa, qazaq eli atynan osylaısha saıysqa túsýshilerdiń juby jarasqan eki sańlaqty alǵashqylarynyń biri deýge bolady. Sport jankúıerleri qaýymyna olardy artyq tanystyryp jatýdyń qajettigi bola qoımas.
Seısenbi, 19 maýsym 2012 7:41
Erli-zaıypty jeńil atletshi Karpovtar Olımpıadaǵa birge barady
Tórt jylda bir aınalyp soǵatyn bul dúbirli dodanyń arǵy-bergi tarıhynda bir shańyraqtyń shamshyraqtary qoıan-qoltyqtasa jarysqa qatysýy sırek oqıǵa bolsa, qazaq eli atynan osylaısha saıysqa túsýshilerdiń juby jarasqan eki sańlaqty alǵashqylarynyń biri deýge bolady. Sport jankúıerleri qaýymyna olardy artyq tanystyryp jatýdyń qajettigi bola qoımas.
Dmıtrıı jáne Irına Karpovtar esimderi kópten beri alysqa tanymal, jeńil atletıka boıynsha Azııa, Eýropa, álem birinshilikteriniń birneshe dúrkin júldegerleri.
Aldymen Dmıtrıı Karpov jaıly aıtqanda, onsaıys boıynsha «V» tobynda byltyr Chehııanyń Kladno qalasynda ótken halyqaralyq jarysta London Olımpıadasyna barýǵa jol ashqan lısenzııany jeńip alǵan bolatyn. Qazaqstan ulttyq qurama komandasynyń beldi bir múshesi turǵysynda sodan beri tynymsyz udaıy daıyndyq ústinde. «Qazir naǵyz sporttyq babymdamyn. Eshteńege alańsyzbyn. Jan-jaqty jattyǵýǵa jaǵdaı jasaldy. Namys týyn joǵary ustaýǵa berikpin», deıdi ol. Daýysynda nyq senim, júzinde jiger bar. Bapkerleri aıtqandaı, sol qýantady.
Munyń aldynda Afına, Beıjiń Olımpıadalaryna qatysyp, birinshisinde qola júldeger atanyp, ekinshisinde joly bolmaı qalyp, endigi kezektegi úshinshi aıqasta uzaq jylǵy jınaqtaǵan bar ónerin aıanbaı jumsaýǵa bekingen jigittiń ózi mejelegen tuǵyrdan kórinýge kúsh salýǵa qulshynysy baıqalady. Al kózdelgen asý bolsa-bolmasyn bıik. Eseni aǵylshyn jeri tórinde qaıtarý kópten kókeıin tesken oı ekenin, budan keıin mundaı múmkindik týar-týmastyǵyn jasyrmaıdy. Muny jeńil atletıkamen shuǵyldanýǵa bala kezinen baýlyǵan ákesi Vasılıı bir jaǵynan qulaǵyna quıyp baǵýda kórinedi.
12 jasynan jeńil atletıkany serik etip kele jatqan Irına Karpovanyń da qosaǵy Dmıtrıı sekildi joǵary deńgeıdegi jarystarda jeńisteri jetkilikti. Osy kóktemdegi el chempıonatynyń «B» tobynda olımpııalyq normatıvti oryndady. Bul sporttyń bessaıys jáne jetisaıys túrleri boıynsha basqasyn aıtpaǵannyń ózinde Parıjdegi, Helsınkıdegi, Osakadaǵy álemdik birinshilikter men qatarynan úsh Olımpıadaǵa qatysýshy jáne odan oljasyz oralmaǵan sańlaq retinde sheberligi de, tájirbıesi de shyńdalǵan. Sátin salsa, Londonda Qazaqstan týyn joǵary jelbiretýge úmittenedi. Janynda qoldaýshysy ári keńesshisi súıikti qosaǵy bolýy qaıratyn qaırap, jigerin janıtyndyǵyna senedi. Irına da Dmıtrıı maqsatyn alaýlatyp, qazaqstandyq jeńil atletıkanyń tarıhynda óshpes iz tastaýǵa qushtar. Áke-shesheleriniń chempıon atanýyn ata-ájesiniń qolyndaǵy qos búldirshinderi de kútýde.
Biri Qaraǵandyda qanattanyp, biri О́skemennen ósip, ózderi oqyǵan joǵary oqý oryndarynyń, ortalarynyń maqtanyshyna aınalyp, ómirde de, sportta da taǵdyr toǵystyrǵan erli-zaıypty jeńil atletshilerge barsha qazaqstandyq jankúıerler zor senim artady. Dmıtrıı men Irına Karpovtardyń bapkerleri shákirtteriniń dúbirli dodaǵa tyńǵylyqty daıyndyqpen kelip otyrǵandyǵyn, qandaı da jeńiske jetýge sheberlikteri shyńdalyp, tájirıbeleri tolysyp, talpynystary taýdaılyǵyn aıtýda. Myńdaǵan tileýqorlar solaı bolýyn qalaıdy. Buǵan deıin aıtarlyqtaı asýlardy alǵan qos úmitker jańa bıikterge jetýde álemniń túkpir-túkpirinen kelip, kúsh synasatyn básekelesteri osal emestigin biledi. Nesi bar, Olımpıada dabyly soǵan shaqyrsa, Karpovtar sonda jaryp shyǵýǵa daıyn.
Aıqyn NESIPBAI,
«Egemen Qazaqstan».
Qaraǵandy.