Seısenbi, 12 aqpan 2013 7:23
El ishinde MAI týraly anekdot, kúldirgi áńgimeler óte kóp. Kez kelgen kólik júrgizýshisi alataıaqtylarmen arada bolǵan jaǵdaıdy maıyn tamyzyp aıtyp beredi. Júrgizýshiler úshin MAI jol boıynda tek aqsha jınaý úshin turady, bular jol erejesin buzǵan saıyn olar qýanady, qujattaryn tekserý úshin toqtatsa da birden «birdeńe dámetip tur» dep oılaıdy. Árıne, shopyrlar da mundaı áńgimelerdi aspannan almaıtyny belgili. Alataıaqtylardyń alaqany qyshyǵany bir bólek, olar sol parany alý úshin oılap tappaıtyndary joq. О́tkende ǵana «Tıtýs» saıtynda shymkenttik bir MAI qyzmetkeriniń ana qujatty bir surap,
Seısenbi, 12 aqpan 2013 7:23
El ishinde MAI týraly anekdot, kúldirgi áńgimeler óte kóp. Kez kelgen kólik júrgizýshisi alataıaqtylarmen arada bolǵan jaǵdaıdy maıyn tamyzyp aıtyp beredi. Júrgizýshiler úshin MAI jol boıynda tek aqsha jınaý úshin turady, bular jol erejesin buzǵan saıyn olar qýanady, qujattaryn tekserý úshin toqtatsa da birden «birdeńe dámetip tur» dep oılaıdy. Árıne, shopyrlar da mundaı áńgimelerdi aspannan almaıtyny belgili. Alataıaqtylardyń alaqany qyshyǵany bir bólek, olar sol parany alý úshin oılap tappaıtyndary joq. О́tkende ǵana «Tıtýs» saıtynda shymkenttik bir MAI qyzmetkeriniń ana qujatty bir surap, myna qujatty bir surap, aqyry túk tappaǵan soń júrgizýshige «RNN, SIK-iń bar ma?» dep tıiskenin aıdaı álemge kórsetti.
Al biraq shyn máninde MAI qyzmetiniń ómirimizdiń qaýipsizdigin qamtamasyz etýde alar orny erekshe. О́zińiz oılańyzshy, eger jol boıynda MAI qyzmetkerleri turmasa, onda júrgizýshiler oıyna kelgenin ister edi. Onsyz da ádemi kólikke minse arqasy qozyp ketetin keıbir qyzýqandy shopyrlar, ásirese, jastar jaǵy bir-birimen jarysyp, birin-biri qýalap, onyń sońy orny tolmas ókinishke ulasyp jatqany jasyryn emes. MAI bolmasa júrgizýshiler mas kúıinde kólik júrgizýden qoryqpas edi. Bul tek óziniń ǵana emes, basqa da adamdardyń ómirine qaýip tóndirý degen sóz.
Sondyqtan MAI qyzmetiniń qıyndyǵy, qyzyǵy, bedeli, abyroıy týraly maqala jazǵymyz kelip OQO IID Jol polısııasynyń bastyǵy Artyqbek Japparovpen telefon arqyly tildestik. Kezdesý ýaqytyn belgilegenmen ony óz kabınetinen tabý óte qıyn boldy. Túsinemiz, jol polısııasy bastyǵynyń sharýasy kóp, birde oıda, birde qyrda degendeı… Aqyry kabınetinde jolyǵyp, attyń jalynda, túıeniń qomynda otyrǵandaı asyǵys túrde suhbat alyp úlgerdik, áıteýir. О́ıtkeni, oblystyń bas jol polısııasynyń telefonynda tynym joq. Negizi uıaly telefonda uıat joq, shyryldaı beredi. Sony ustap júrgen adamdar uıalýy tıis. Joq, Artyqbek Japparov myrza aldymda adam otyr-aý, suhbat berip otyrmyn-aý dep qymsynbady. Onyń ústine qaıta-qaıta typyrshyp, bir jınalysqa asyǵyp turǵanyn eskertýmen boldy. Áıteýir, bizden tezirek sytylǵysy keldi. Sodan MAI-dyń osy ýaqytqa deıin atqarǵan jumysy týraly tolyq málimet berýdi suradyq. Mine, osy jerge kelgende Japparov myrza qatty qıpaqtady. Qolyndaǵy eki-úsh bettik málimetti bir berdi, odan «ishinde ózgertetin jeri bar eken» dep qaıtyp aldy. Sońynda «málimettiń bárin eki-úsh kúnde tolyq qolyńyzǵa tıgizemin» degen soń, elektrondyq poshtamyzdy da jazyp berip, qaıttyq. Bul ótken jyldyń sońǵy aılary bolatyn. Sodan Japparovty joǵalttyq. Telefon soqsań, «mine, mine jiberemin» deıdi de, izim-qaıym joq bolady. Qazir jarııalylyq zamany, kez kelgen mekemeden baspasóz hatshysy arqyly suraǵan málimetimizdi qıyndyqsyz ala berýshi edik, oıpyrmaı, oblystyq MAI-den qystyń kúni qar surap alýdyń ózi qıyn eken.
«Jazǵan kulda sharshaý joq», endi OQO ishki ister departamentiniń baspasóz qyzmetine habarlastyq. Obaly ne kerek, baspasóz qyzmetiniń jetekshisi Saltanat Qarakózova óte sypaıy sóılesip, bar saýalymyzdy, suraıtyn málimetimizdi departamenttiń saıtyna, oblystyq IID-niń bastyǵy Asqar Ospanovtyń atyna joldaýymyzdy ótindi. Jiberdik. «Sizderge qarasty Jol polısııasynyń jumysy týraly málimet alý óte qıyn. Mine, bir aıdan asty Jol polısııasy málimetti áne beremiz, mine beremiz dep aldap kele jatqanyna… Nege ekenin qaıdam, olar málimet berýge múldem qulyqsyz» degen suraǵymyzǵa kóp ótpeı-aq jaýap keldi. OQO IID-niń bastyǵy, polısııa polkovnıgi Asqar Ospanov bizdiń saýalymyzǵa qysqasha: «Ońtústik Qazaqstan oblysy Jol polısııasy qyzmeti týraly málimetterdi alý úshin, siz OQO IID Jol polısııasy basqarmasynyń basshylyǵyna sizge qajetti suraqtar boıynsha qatynas hat arqyly nemese ózińiz kelip jol polısııasy jumysyna qatysty tolyq aqparattardy alýyńyzǵa bolatynyn habarlaımyn», dep jaýap beripti.
Anekdot degen osyndaıda eske túsedi ǵoı. Alys aýdandaǵy bir top polısııa qyzmetkerleri oblystaǵy bastyǵyna aryz jazypty. «Qurmetti Pálenshe Túgensheuly, sizge aryzdanýymyzǵa bizde aqshanyń sheksiz jınalatyny sebep bolyp otyr. Bizge oblystan keletin komıssııa kóp. Árqaısysyna bólek-bólek aqsha jınaımyz. Qalaı «komıssııa keledi eken» degennen bastyǵymyz shaqyryp alyp, aqsha jınaýǵa tapsyrma beredi…» dep bastalatyn aryzdy oblystaǵy bastyq oqyp bolǵan soń, tez arada osy jaıtty tekserýge álgi aýdanǵa taǵy bir komıssııa jiberipti.
Mine, Ospanov myrzanyń da jaýaby osy sııaqty boldy. «Oblystyq MAI-den málimet ala almaı júrmiz» degen saýalymnyń sózderin aýystyryp, «málimetti oblystyq MAI-den alasyzdar» degen jaýabyna kúlesiz be, jylaısyz ba? Jaqynda ǵana Elbasynyń quqyq qorǵaý organdary basshylarymen ótken úlken jıynda Ońtústiktiń jol polısııasy salasy qatty synǵa ushyrady. 12 qańtar kúni Shymkent qalasyndaǵy Táýke han dańǵyly men Qazybek bı kóshesiniń qıylysynda MAI qyzmetkerleri M.О́mirov júrgizip kele jatqan jeńil kólikti toqtatady. Neden tutanǵanyn qaıdam, áıteýir arada túsinispestik týyndaǵan. Sodan, qysqasy, О́mirovke qarsy kóliktiń memlekettik nómiri joq jáne polısııa qyzmetkerine qarsylasty, kúsh kórsetti degen aıyppen qylmystyq is qozǵalady. Shynynda tekserý barysynda kóliktiń artqy nómiri joq bolyp shyqqan ári polısııa qyzmetkeriniń pogony julynǵan. Biraq, artynsha M.О́mirov prokýratýraǵa aryzdanyp, nátıjesinde álgi MAI qyzmetkerleri kólikti toqtatqan jerge jaqyn ornalasqan «Oskar» valıýta aıyrbastaý pýnktiniń beınekamerasynyń túsirgenderin qarap shyǵýǵa týra keledi. Onda júrgizýshi kólikten túspesten qujattaryn kórsetip jatqanda, polısııanyń ymdaýymen belgisiz bireýdiń kóliktiń artqy nómirin sheship alǵany jáne polısııa qyzmetkeri kóliktiń artqy oryndyǵyna otyryp pogonyn ózi sheship tastaǵany anyq túsip qalǵan. «Nátıjesinde oblystyq jol polısııasynyń birneshe qyzmetkeriniń ústinen Qylmystyq kodekstiń 308-baby, 4-tarmaǵy boıynsha qylmystyq is qozǵaldy» deıdi ál-Farabı aýdany prokýrorynyń orynbasary Bolat Jumataev.
Mine, «alataıaqtylar týraly anekdot nege kóp?» dep eshkimdi jazǵyra almaısyń, ony ómirdiń ózi týdyrady. Jol polısııasynyń joǵarydaǵy soraqy tirligi ómirden alynǵan anekdot emeı, nemene? Áıtse de, Artyqbek Japparovtyń bizben emin-erkin sóılespeı, málimetterdi bermeı jasyryp qalǵanyna qaraǵanda, Ońtústiktiń jol polısııasynda biz bilmeıtin talaı bylyqtyń, talaı anekdottyń búrkeýli jatqanyn aıtpaı-aq túsinesiń.
Oralhan DÁÝIT,
«Egemen Qazaqstan».
Ońtústik Qazaqstan oblysy.