Abaı atyndaǵy Qazaq ulttyq pedagogıkalyq ýnıversıtetinde «Open space» formatynda rektor Takır Balyqbaev jurtshylyqpen kezdesý ótkizdi. Kezdesýge prorektorlar men departament dırektorlary, stýdenttik rektorat músheleri qatysty. Osy kezdesý barysynda jetpisten astam ótinish qaraldy.
Ýnıversıtettiń Baspasóz qyzmetinen habarlaǵanyndaı, kezdesý barysynda oqý aqysy, bir mamandyqtan ekinshi mamandyqqa aýysý, jataqhana jaǵdaıyn jaqsartý jáne oqý úderisindegi uıymdastyrý jumystary, basqa da áleýmettik mańyzy bar máseleler týraly suraqtar qoıyldy. Ár ótinish berýshi rektormen jáne ýnıversıtettiń basqa da basshylarymen betpe-bet sóılesip, usynystaryn ashyq aıtýǵa múmkindik aldy. Bul kezdesýde stýdentter men olardyń ata-analary kókeıkesti máselelerin emin-erkin ortaǵa saldy.
Ýnıversıtet basshylary ózderiniń quziretterine qatysty suraqtarǵa dáıekti jaýap berdi. Barlyq ótinish berýshilermen tikeleı baılanys ornatqan ýnıversıtet rektory «Open space» qatysýshylarynyń máselelerin óz basshylyǵyna aldy.
Rektormen kezdesýge kelgen stýdentter men ata-analar kóptegen máselelerdi jedel sheshýge múmkindik aldy. Keıbir máselelerdiń oryndalý merzimin kórsetilip, tıisti qurylymdyq bólimshelerge tapsyrma berildi.