Almatydaǵy qyzmeti erekshe emdeý mekemesiniń biri – Uly Otan soǵysy ardagerleriniń emhanasy «Memlekettik kommýnaldyq qazynalyq kásiporny». Aty aıtyp turǵandaı, emhana jasy ulǵaıǵan jandarǵa, Uly Otan soǵysy ardagerlerine jáne olarǵa teńestirilgen tulǵalarǵa, sonymen qatar aýmaqtyq tirkelgen turǵyndarǵa medısınalyq kómek kórsetetin qalalyq keńestik-dıagnostıkalyq ortalyǵy bolyp esepteledi.
Aq samaıly ardagerlerdiń búginde azaıyp bara jatqany ras. Sondyqtan aýqymdy jáne keshendik is-sharalar júrgizýdi talap etetin emdeý ortalyǵy da zamana kóshinen qalmaý úshin kóp tirlik atqarýda. Qazirgi tańda bul emhanany medısına ǵylymdarynyń doktory Qaldybaı Madıbraımov basqarady. Ol kisiniń gerontologııa salasyndaǵy naýqastardyń densaýlyǵyn tekserý men emdeýdiń zamanaýı tehnologııalarynyń bastamashysy ekenin aıta ketsek artyq bolmas.
Medısına damyp jatqan zamanda emhana qyzmeti sapaly deńgeıge kóterilip, zamanaýı tehnologııalar osynaý mekemeden tabylýy tıis qoı. Osy máseleni birinshi kezekke qoıyp otyrǵan Qaldybaı Maqataıuly ardagerlerdiń kópshiligi qazir óz betinshe júrip-tura almaıtyndyǵyn, olarǵa úlken kútim kerek ekendigin aıtady. Sondyqtan dárigerler naýqastardyń úılerine jıi baryp, densaýlyǵyn baqylap, emdep otyrady.
Qazirgi kezde emhana qyzmetpen qamtyp otyrǵan turǵyndar sany – 33173 bolsa, soǵys ardagerleri men oǵan teńestirilgen ardagerler sany – 12457 eken. Oǵan qosa soǵys ardagerlerine jáne olarǵa teńestirilgen tulǵalarǵa medısınalyq qyzmet kórsetý qalanyń jeti aýdany boıynsha iske asyrylady.
Munda jyl saıyn qan aınalymy, ishek obyry, qant dıabeti, glaýkoma aýrýlaryna qatysty aldyn ala profılaktıkalyq tekserýler, mammografııalyk zertteýler júrgizilip jatady.
2000 jyly 30 tósekti kúndizgi stasıonar bólimshesi ashylǵan bolatyn. Osy kúndizgi stasıonar yńǵaıly jıhazdarmen, turmystyq tehnıkamen, emdeıtin fızıoterapevtıkalyq apparattarmen jabdyqtalǵan.
Sol sııaqty, atalmysh emhanada júkti áıelderdi esepke alý jolǵa qoıylǵan. Aldyn-alý jumystaryn belsendi júrgizý arqyly jaqsy kórsetkishterge jettik, onyń ishinde júkti áıelderdi temir jáne ıodtapshylyǵynan emdeýge jáne onyń aldyn alý tegin júrgiziledi, – deıdi bas dárigerdiń emdeý isine jaýapty orynbasary Gúlnar Shahmanova.
Jyl saıyn emhanada S.J.Asfendııarov atyndaǵy Qaz UMÝ kafedralaryn tartýmen «Ashyq esik kúni», «Qart tulǵalar kúni» degen is-sharalar ótedi. Sonymen qatar, Ardagerler qoǵamynyń ókilderimen dóńgelek ústel ótkiziledi.
– Aýrýlardy emdeıtin kúndizgi stasıonardyń, úı jaǵdaıynda kómek kórsetetin stasıonardyń, kúndiz kelip emdeletin jartylaı stasıonardyń kómegin múmkindiginshe keńeıtý kerektigi sezilýde. Jasy ulǵaıǵan naýqastardy konservatıvti terapııamen emdeý kerek. Osyǵan baılanysty Uly Otan soǵysy ardagerleri emhanasynyń aýmaǵynda soǵys ardagerleri men eńbek jáne oǵan teńestirilgen tulǵalar úshin stasıonardy almastyratyn kúndizgi stasıonar ashylsa deımiz, kúnine bir ret túski as beretin, jaqsy fızıoterapevtik bólimshesimen, sýmen emdeýge, medısınalyq jáne saýyqtyrý sharalaryn ótkizýge arnalǵan sanatorıılik stasıonar bolsa nemese «Ardager» keshendik sanatorııi sııaqty stasıonar bólinse deımiz, – deıdi emhana jetekshileri.
Mine, osylaı Almatydaǵy Uly Otan soǵysy ardagerleriniń emhanasy óz emdelýshileriniń densaýlyǵyn qorǵaýda qoldan kelgen kómekti jasap, medısınalyq jáne áleýmettik kómek kórsetýde. О́ıtkeni, qart adamdardy keshendik qorǵaý memleket saıasatynyń basymdylyǵyna ıe bolyp keledi.
Aınash ESALI,
«Egemen Qazaqstan».
ALMATY.