Adam ómirdiń qaı kezeńinde bolmasyn ata-babasynan qalǵan asyl muralary bolyp eseptelinetin tarıhy men ulttyq ónerdi tanyp bilýge umtylǵan. Qazaqstan Respýblıkasynyń táýelsizdik alýy ulttyq sananyń kúrt oıanýyna aıryqsha yqpal etkeni aıan. Egemen eldiń týyn kókke kóteretin, árıne, órkenıetti urpaq, sondyqtan da, sol bolashaq ıelerin jan-jaqty jetilgen, aqyl parasaty mol etip tárbıeleýimiz qajet. Qaı halyq bolmasyn úmitin eń aldymen urpaǵynan kútedi. Búgingi tańda árbir memlekettiń aldyna qoıǵan maqsaty tarıh sahnasynan oryn ala otyryp, órkenıetti elderdiń qataryna qosylý bolsa, sol ekonomıkasy jaqsy damyǵan elderdiń basty jetistikteri olardyń qazba baılyqtarynyń kóptigi nemese jer kóleminiń úlkendiginde emes, sondaǵy baılyqty óz ornymen ıgere bilýinde. Bul qajettilikti qanaǵattandyrý úshin el erteńi – búgingi jas urpaqqa sapaly bilim men sanaly tárbıe berýge búkilhalyqtyq dárejede mán berý – qazirgi kezdegi mańyzdy másele.
Elbasy N.Nazarbaev «Qazaqstan-2050» Strategııasy – qalyptasqan memlekettiń jańa saıası baǵyty» atty Joldaýynda: «Biz ulttyń tarıhı sanasyn qalyptastyrý jumysyn jalǵastyrýymyz kerek», – dep atap kórsetken bolatyn. Osyǵan oraı S.Jıenbaev atyndaǵy Aqtóbe oblystyq jasóspirimder kitaphanasy da bul máseleni keńinen qamtyp, jastardy ult tarıhyn, dástúrin, mádenıetin bilýge baýlýda. Jaqynda osy maqsatta kitaphananyń oqý zalynda oqyrmandarǵa arnap «Ulttyq tarıh – qazynamyz» atty kórme uıymdastyryldy. Taǵdyry talaıly elimizdiń táýelsizdikke deıingi tarıhy men búgingi jetistigin dáripteı otyryp, jastardy eljandylyqqa tárbıeleý, otanshyldyq sezimin oıatý maqsatynda oqý jyly bastalysymen kitaphanashylar №36, 40, 47 mektepterde dárister oqýdy josparlap otyr.
Aqyn Oljas Súleımenov: «Biz óz halqymyzdyń mádenıeti men tarıhyna qyzmet etýimiz kerek» demekshi, Qazaqstan memleketin mádenıeti joǵary, rýhy bıik, patrıottyq sezimi berik azamattardyń Otanyna aınaldyrý úshin bárimiz bir kisideı ter tógýimiz kerek.
Aıgúl QRYMQULOVA,
kitaphana qyzmetkeri.
AQTО́BE.