Keshe Astanada Mádenıet jáne aqparat mınıstrliginiń uıymdastyrýymen Shámshi Qaldaıaqov atyndaǵy halyqaralyq «Meniń Qazaqstanym» atty án festıvaliniń ashylý rásimi ótti.
Keshe Astanada Mádenıet jáne aqparat mınıstrliginiń uıymdastyrýymen Shámshi Qaldaıaqov atyndaǵy halyqaralyq «Meniń Qazaqstanym» atty án festıvaliniń ashylý rásimi ótti.
Qazaqstannyń ár óńirinen, sondaı-aq, Qytaı, Reseı, Mońǵolııa, О́zbekstan, Qyrǵyzstan respýblıkalarynan osymen 4-shi márte ótip otyrǵan Shámshiniń án baıqaýyna qatysýshy ónerli órenderge Mádenıet jáne aqparat mınıstrligi Mádenıet komıtetiniń tóraǵasy Tileýǵalı Qyshqashbaev sáttilik tilep, ánimen qanshama urpaq sýsyndaǵan kompozıtordyń shyǵarmalaryn ulyqtaý isi munan da ulǵaıa túsetinin tilge tıek etti
Qazaqstannyń halyq ártisi Altynbek Qorazbaev: «Shámshi aǵamyz ótken ǵasyrdyń elýinshi jyldary qazaq halqynyń mańdaıyna bitken jaryq juldyzy, Jaratqannyń erekshe syıy dep bilemin. Baıaǵy Birjan, Aqan, Kenenderdiń jalǵasy – Shámshi aǵamyzdyń áni búkil qazaq dalasyna keńinen jaıylyp ketkeni ras. Bul baıqaý 90-jyldary bastalǵan bolatyn. Shákeńe arnalǵan alǵashqy shara ózi týyp-ósken ońtústiginde bastalsa, eki jyldan keıin Jambylda, odan keıin Qazaqstannyń túkpir-túkpirin aralap kete bardy. Bıylǵy festıvalǵa 4-5 memleketten oryndaýshylar kelip qatysýda. Sondyqtan qazylar alqasynyń tóraǵasy retinde aıtarym, munda oń kóz, sol kóz degen nársege jol berilmeıdi jáne de ondaı barmaq basty, kóz qysýshylyq ónerde eshqashan bolmaýǵa tıis deı kelip, usynys aıtty. «Jer-jerde Shámshiniń atyn ulyqtaýda qyrýar is-sharalar atqarylýda. Oǵan rahmet. Biraq keıingi ósip kele jatqan jas ónerpazdarǵa bir nárse jetpeıtin sııaqty bolyp kórinip turady. Bul – Shámshi Qaldaıaqov atyndaǵy memlekettik syılyq» dedi.
Rasymen kompozıtorǵa kórsetilip jatqan qurmette shek joqtaı. Shymkent qalasyndaǵy fılarmonııaǵa esimi berilgen, shyraıly shym qalada kóshesi jatyr kósilip, saıabaqta Qaldaıaqov eskertkishi menmundalaıdy, ásem Almatyda kóshesi taǵy bar degendeı, týǵan ólkesi – Sháýildir aýylyndaǵy kompozıtor esimine ıe mýzyka mektebinde sandaǵan shákirt bilim nárimen sýsyndap ósýde. «Shámshiǵumyr» atty estelikter men maqalalar jınaǵy jaryq kórdi. Belgili kompozıtor Qaldybek Qurmanáliniń shámshitanýǵa sińirip júrgen eńbegi óz aldyna. Elorda tórinde baıtaq jurt kóz tikken báıgeniń talaı talantqa arqa bitirip, delebesin qozdyra túsken túri bolsa mynaý. Taǵy sondaı birazyn aıtýdy umytyp otyrǵan shyǵarmyz. Táýbe deıik. Biraq «vals koroli» atanǵan tulǵanyń ánderi áli de talaı tańdardy atyryp, kúndi uıasyna qondyra bererin eskersek, istelgen sharýalar teńizdiń tamshysyndaı ǵana bolyp kórinip turady.
Halyqaralyq «Meniń Qazaqstanym» án festıvaliniń maqsaty jastardyń shyǵarmashylyǵyna jan-jaqty qoldaý kórsetý, qazaq estradasy sheberleriniń ónerin nasıhattaý, daryndy jas kompozıtorlardyń shyǵarmashylyǵyn ushtaýǵa barynsha múmkindik týǵyzý desek, qazaq estradasynyń keleshegi osyndaı ulttyq jobalarmen kemeldenýi kerek dep esepteımiz. Altynbek Qorazbaev, Altynaı Jorabaeva, Tolqyn Zabırova syndy belgili ánshilerdiń oryndaýynda kompozıtordyń «Tamdy arýy», «О́mir-ózen», «Arys jaǵasynda» ánderi shaǵaladaı samǵady. О́ner saıysy 25 qazanda «Qazaqstan» ortalyq konsert zalynda ótetin gala-konsertpen túıindeledi dep kútilýde. Eskirmeıtin, ýaqytqa des bermeıtin Shámshi ánderi ǵajaby kóp, bir sıqyr!
Qarashash TOQSANBAI,
«Egemen Qazaqstan».
–––––––––––––––––––––––––
Sýretti túsirgen
Erlan OMAROV.