Elordadaǵy daryndy er balalarǵa arnalǵan qazaq-túrik lıseı-ınternatynda «Sapaly bilimniń negizi – tárbıe men oqytýdyń tutastyǵy» degen taqyrypta ǵylymı-ádistemelik semınar ótti.
Elordadaǵy daryndy er balalarǵa arnalǵan qazaq-túrik lıseı-ınternatynda «Sapaly bilimniń negizi – tárbıe men oqytýdyń tutastyǵy» degen taqyrypta ǵylymı-ádistemelik semınar ótti.
Astana qalalyq bilim basqarmasy men qazaq-túrik lıseı-ınternaty birigip uıymdastyrǵan sharaǵa elorda mektepteri dırektorlarynyń oqý isi jónindegi orynbasarlary qatysty. Semınardyń ashylýy barysynda «Oqýshylardy shyǵarmashylyqqa tárbıeleýdegi ulttyq qundylyqtardyń mańyzy» degen taqyrypta L.N.Gýmılev atyndaǵy EUÝ praktıkalyq qazaq til bilimi kafedrasynyń dosenti Aınur Naımanbaı, «Oqýshylardyń fýnksıonaldy saýattylyǵyn damytýdyń nátıjeliligi» degen taqyrypta qazaq-túrik lıseı-ınternat dırektorynyń beıindik oqytý jónindegi orynbasary Gúlnaz Musabekova jáne «Aqparattardy kópdeńgeıli qorǵaýmen qamtamasyz etý» degen taqyrypta «KATEV» HQQ ádiskeri, ınformatıka pániniń muǵalimi Ismaıl Gesen baıandama jasady.
Byltyr orta bilim berý júıesin túbegeıli ózgertý maqsatynda Elbasynyń tapsyrmasymen 2012-2016 jyldarǵa arnalǵan ulttyq jospar jasalǵany belgili. Onda oqýshylardyń bilimin shynaıy ómirmen ushtastyrý kózdelgen. Olardyń fýnksıonaldyq saýattylyǵyn damytý men oqý úderisiniń mazmundyq, oqý-ádistemelik, materıaldyq-tehnıkalyq máselelerine basymdyq berilgen edi. Soǵan baılanysty oqýdyń mazmunyn jańartýdy, metodıkasyn ózgertýdi qolǵa alǵan bilim ordalarynyń biri – Daryndy er balalarǵa arnalǵan qazaq-túrik lıseı-ınternaty. «Biz qazir damýdyń ekinshi satysyndamyz. Interaktıvti oqytý boıynsha úsh túrli baǵdarlamamyz bar. Onyń biri – muǵalim men oqýshynyń arasyndaǵy qashyqtyqty joıatyn, ıaǵnı, oqýshy qaı jerde tursa da muǵaliminen sabaq ala alatyn baǵdarlama bolsa, ekinshi baǵdarlama shaǵyn jobalaý dep atalady. Munda oqýshy alǵan bilimin ómirdegi oqıǵalarmen sáıkestendirip ózderi jobalap otyrady. Mysaly, oqýshy kúndelikti sabaq barysynda muǵalimniń aıtqanynyń 10-15 paıyzyn ǵana este saqtaıdy. Eger sony shaǵyn jobalaý arqyly oqıtyn bolsa 80-90 paıyzǵa deıin bilim ıgeredi. Úshinshi baǵdarlama jeke tulǵany baǵdarlaý dep atalady. Bul, ásirese, hımııa, fızıka pánderinde kóbirek qoldanylady. Sonymen birge, synı turǵydan oılaný, qosymsha bilim berýdi damytý boıynsha da jumystar júrgizip jatyrmyz», – dedi lıseı-ınternat dırektorynyń beıindik oqytý jónindegi orynbasary Gúlnaz Musabekova óz baıandamasynda.
Semınardyń resmı ashylýy aıaqtalǵan soń ustazdar qazaq-túrik lıseı-ınternatynyń pán muǵalimderi ótkizgen praktıkalyq, semınar sabaqtary men túrli trenıngterge qatysty.
Esterińizge sala keteıik, daryndy er balalarǵa arnalǵan qazaq-túrik lıseı-ınternatynyń qurylǵanyna bıyl jıyrma jyl. Lıseı-ınternatqa balalar jetinshi synyptan bastap bilim ordasynyń talabyna saı testileýden keıin qabyldanady.
Aıgúl SEIILOVA,
«Egemen Qazaqstan».