Jambyl oblysyndaǵy Qazaq-qyrǵyz memlekettik shekara shebinde QR UQK Shekara qyzmeti «Ońtústik» óńirlik basqarmasy Qordaı shekara otrıadynda «Sortóbe» shekara beketiniń saltanatty ashylý rásimi ótti.
Jambyl oblysyndaǵy Qazaq-qyrǵyz memlekettik shekara shebinde QR UQK Shekara qyzmeti «Ońtústik» óńirlik basqarmasy Qordaı shekara otrıadynda «Sortóbe» shekara beketiniń saltanatty ashylý rásimi ótti.
Qazaqstan Respýblıkasynyń Memlekettik shekarasyn jaılastyrý jónindegi memlekettik baǵdarlama aıasynda elimizdiń ońtústik jáne shyǵys óńirlerinde bıylǵy jyly 20 bólimshe iske qosyldy.
Qazaqstan Respýblıkasy Ulttyq Qaýipsizdik komıtetiniń tóraǵasy Nurtaı Ábiqaev «Sortóbe» beketin asha otyryp, bólimshe bastyǵyna rámizdik kiltti tapsyrdy. Sonymen birge, ol memlekettik shekarany jaılastyrý aýqymdy memlekettik baǵdarlamasyn júzege asyrýda kezekti qadam jasalǵandyǵyn, tek 2013 jyly jańa talaptarǵa saı 20 shekara beketiniń iske qosylǵandyǵyn atap ótti.
– Elimizdiń irgesin bekemdeý maqsatynda salynǵan bul «Sortóbe» shekara beketi zaman talabyna saı sońǵy úlgidegi tehnıkalarmen jabdyqtalǵan. Radıolokasııalyq, beınebaqylaý apparattary, bir ózi birneshe fýnksııany atqaratyn qondyrǵylar, aýa raıy men tabıǵı jaǵdaıdyń barlyq ózgerisine yńǵaılandyrylǵan mobıldi tehnıka jáne qozǵalys quraldarynyń qajetti túrlerimen qamtamasyz etilip otyr. Memleketimizdiń táýelsizdigi men tutastyǵyn saqtaý úshin el shekarasyn bekemdeý kerek. Ulttyq qaýipsizdik máselesine Elbasy Nursultan Nazarbaev erekshe mán berip, barynsha kóńil bólýde, – dedi Nurtaı Ábiqaıuly.
Komıtet basshysynyń qolynan beket shekarashylary jańa páterlerdiń kiltterin aldy. Parlament Senatynyń depýtattary, Jambyl oblysynyń ákimi jáne basqa da shaqyrylǵan qonaqtar shekara qalashyǵynyń ınfraqurylymymen, sondaı-aq, avtokólik jáne shekaralyq qyzmetke qoldanylatyn arnaıy tehnıkalarmen tanysty.
Olarǵa kezekshi bóliminen bastap ofıserler turatyn úılerge deıin kórsetilip, shekara saqshylary bıylǵy jyly alynǵan avtomobılder men arnaýly tehnıkalardyń qalaı jumys isteıtindigin is júzinde kórsetti.
«Sortóbe» shekara beketinde tıisti aımaqty alystan baqylaý korpýsy men sport zaly, tikushaq qonatyn alań, qyzmetkerlerdiń demalatyn orny jáne shekaralyq qyzmettiń attary men ıtterin baǵatyn shaǵyn qora-jaıy da bar.
Tolyqtaı jabdyqtalǵan mundaı beketter eldiń ekonomıkalyq ahýalyn da tanytady. Sonymen qatar, byltyr ǵana qabyldaǵan Shekara týraly Zań da memlekettiń tutastyǵy men el tynyshtyǵyn saqtaý mindetine qyzmet etedi. Aıta ketý kerek, sońǵy 2-3 jyldyń kóleminde Jambyl oblysynda 12 shekara beketi paıdalanýǵa berilip otyr. Bir ǵana Qordaı aýdanynyń ózinde 5 beket salynýda. Shekara qyzmeti úshin boı kótergen beketter memleket terrıtorııasynyń tutastyǵyn saqtaýmen qatar, sol óńirdegi kishigirim aýyldar men eldi mekenderdiń jaǵdaıyna da jaǵymdy áser etýde. Jańa mektep, balabaqsha men emhana salynyp, taqtaıdaı tas jol túsýde. «Sortóbe» shekara beketin «Promhımmontaj» AQ 11 aıda soǵyp, belgilengen merzimde tapsyryp otyr.
Depýtattar Qazaqstan shekarashylarynyń halyq pen eldiń múddesine rııasyz qyzmet etetindigine, áskerı antqa jáne qyzmettik paryzǵa adal bolatyndyǵyna senim bildirdi.
Qanat ESKENDIR,
«Egemen Qazaqstan».
ALMATY.