Qyzylordadaǵy Jastar teatrynyń repertýary taǵy bir jańa qoıylymmen tolyqty. Mádenıet jáne óner salasy ókilderiniń merekesi kúni teatrda «Eki bala – eki shal» spektakliniń premerasy ótti.
«Alash» halyqaralyq ádebı syılyǵynyń laýreaty Qýandyq Túmenbaıdyń eki márte Sosıalıstik Eńbek erleri Ybyraı Jaqaev pen Jazylbek Qýanyshbaevtardyń ómiri men júrip ótken jolyn ózek etken «Eki bala – eki shal» atty spektakli ádebıette áldeqashan umyt bolǵan eńbek taqyrybyna arnalyp otyr.
Qoıylym molda aldynan bilim alǵan balalardan bastalady. Sabaqtan jalyqqan bala Ybyraı baýyry Syzdyqqa «Sendeı emespin, oqýǵa qulqym joq. Budan da dalaǵa baryp, eńbek etkenim kóp artyq» dep sabaǵyn tastap ketedi. Bul bilimnen qashý emes, eńbekke degen qushtarlyq edi. Kelesi sát sahnada jalt etip, Moıynqum dalasynda qoı baǵyp júrgen Jazylbek Qýanyshbaev kórinedi. Qoıylymnyń ónboıynda eńbektiń arqasynda biri dán ata, biri Jazata atanǵan eki alyptyń ómiri qatar órilip otyrdy.
Tirshiliginde Shıeli men Moıynqumnyń arasyn jaqyndatyp, baýyrdaı syılasqan qos batyrdyń dostyǵy urpaqqa ańyz. Bir ókinishtisi, qazir biz qara ketpeni men aq taıaǵyna senip eńbek etken, el baılyǵyn eselegen osy qaıratker tulǵalardyń esimin kóp aıta bermeımiz.
– Buryn eńbek taqyryby degen ádebıettiń negizgi josparlarynyń biri edi. Qazir biz sony esten shyǵaryp aldyq. Elbasy bastamashy bolǵan «Rýhanı jańǵyrý» baǵdarlamasy aıasynda biraz bastama qolǵa alynǵan edi. Sony jalǵastyra berýimiz kerek, – deıdi shyǵarma avtory.
– Bıyl Ybekeńniń týǵanyna 130, Jazylbek aqsaqalǵa 125 jyl tolady. Qos datany eskerip jazǵan dúnıemdi sahnalap jatqan teatr basshylyǵyna alǵystan basqa aıtarymyz joq.Oqıǵaly qoıylymnyń shyrqaý sheginde Almatydaǵy jazýshylar jıynyna qatysqan qos alypty kóremiz. Bul kezinde Ybekeńniń «Dıqan ketpenine, qoıshy taıaǵyna, jazýshy qalamyna ıe bolsyn» degen qanatty sózi aıtylatyn jınalys edi. Sahnadan qaıtalanǵan osy sóz kórermendi taǵy bir oıǵa túsirdi. Árkim óz isinde, ár nárse óz ornynda tursa qoǵam damýy da durys baǵyt alar edi-aý.
Tehnologııa damyǵan qazirgi zamanda dıqannyń bir aılyq jumysyn áp-sátte bitirýge bolady. Erinbegender maldy mashınamen, eringender óristegi túlikti qaltasyndaǵy alaqandaı telefonmen baǵýǵa kóshken qazirgi zamanda beınetke belshesinen batyp eńbek etkender jaıly áńgime ertegideı estilýi de múmkin-aý.
Biraq qasıetti qara ketpen men shopannyń aq taıaǵynyń orny bólek. Premeralyq qoıylymnyń aıtar oıy osy dep uqtyq.
Spektakl sońynda týyndy avtory, jazýshy Qýandyq Túmenbaı sóz alyp, qala basshylyǵyna, shyǵarmasyn sahnaǵa laıyqtaǵan teatrdyń kórkemdik jetekshisi Ońtalap Nurmahanovqa, qoıylym rejısseri Erǵazy Ábjalıevke, teatr ártisterine alǵys aıtty.Az jylda repertýaryn túrli taqyryptaǵy qoıylymmen baıytyp úlgergen qalalyq Jastar teatry ujymy aldaǵy ýaqytta spektakldi Jambyl oblysyna aparyp qoıýdy josparlap otyr. QYZYLORDA