19 qańtar kúni keshkilik saǵat bester shamasynda Josaly aýyldyq okrýgindegi «Janǵoja» sharýa qojalyǵynyń jetekshisi Serikbaı Zakarınge aýyldan 10 shaqyrymdaı jerde shanaǵa jegilgen aty ábden boldyrǵan, aıazdy boranǵa ushyraǵan Shyńǵyrlaý aýdanynyń Qaraaǵash aýylynan shyqqan 3 adamnyń aýyr halderi jónindegi sýyt habar tústi.
19 qańtar kúni keshkilik saǵat bester shamasynda Josaly aýyldyq okrýgindegi «Janǵoja» sharýa qojalyǵynyń jetekshisi Serikbaı Zakarınge aýyldan 10 shaqyrymdaı jerde shanaǵa jegilgen aty ábden boldyrǵan, aıazdy boranǵa ushyraǵan Shyńǵyrlaý aýdanynyń Qaraaǵash aýylynan shyqqan 3 adamnyń aýyr halderi jónindegi sýyt habar tústi.
Habardy estı sala Serikbaı Zakarın jedel túrde kıinip alyp, qorada turǵan áldi de tyń atyna mine sala, aýyldan 10 shaqyrymdaı jerde ornalasqan «Áztóbe» núktesine attandy.
Kún bolsa qar jaýyp, tóńirek aq tútek boranǵa ulasqan. Tóńirekti barlap, qaraýdyń ózi qıynǵa aınaldy. Degenmen, keshki saǵat 6 jarymnyń shamasynda ózderi ábden jaýraǵan, betteri dombyqqan, qaljyraǵan qaraaǵashtyq úsh adamdy (bireýi 5-synyptyń oqýshysy) Serikbaı «Áztóbe» núktesinen tapty. Kelgen boıda Serikbaı sharshap, qaljyraǵan, ústeri sýlanǵan adamdarǵa alǵashqy kómekterin kórsetip, olardyń aıtýlary boıynsha Qaraaǵash aýylyndaǵy azamattarǵa uıaly baılanys arqyly habarlap, kómek shaqyrdy.
Kóp keshikpeı Qaraaǵash aýylynan da adamdar kómekke keldi. Sóıtip, borandy kúni adasyp, qarǵa ombylaǵan at ábden sharshaǵan soń jaǵdaılary múshkil halge aınalǵan qaraaǵashtyq adamdar Josaly aýylynyń azamattarynyń aralasýlarymen aman qaldy.
Dúısenbi kúnge qaraǵan shaqta, ıaǵnı 20 qańtar kúni tańǵy saǵat 4-ke taıaý kezde Serikbaı óziniń atyn shanaǵa jegip, boldyrǵan atty jetekke ala dalada adasqan adamdardy otbasylaryna aman-esen jetkizdi.
Sonymen Oral qalasynda oqıtyn 5-synyp oqýshysyn kórshiles Josaly aýylyna jetkizip, qalaǵa jóneltýdi maqsat etken qaraaǵashtyqtar qaıyrymdy azamat Serikbaı Zakarınniń arqasynda kóldeneń kelgen kesapattan aman qaldy.
Serikbaıdyń qıyn shaqtaǵy jedel de batyl isine Syrym jáne Shyńǵyrlaý aýdanynyń basshylary da dán rıza bolýda. Al, borandy kúnde adasqan adamdarymen qaýyshqan otbasylardyń Serikbaıǵa aıtar alǵystary erekshe edi.
Músirbek AITAShEV.
Batys Qazaqstan oblysy,
Syrym aýdany.