Qapshaǵaı qalasynda Aýyl sharýashylyǵy mınıstri Erbol Qarashókeev, Senat depýtaty Aqylbek Kúrishbaev, Almaty oblysynyń ákimi Qanat Bozymbaev jáne Ekologııa, geologııa jáne tabıǵı resýrstar mınıstriniń orynbasary Serik Qojanııazov kezdesip, óńirdegi aýyl sharýashylyǵynyń damýyna qatysty ózekti máselelerdi talqylady. Jıynǵa aýdan, qala ákimderi, sol sııaqty sharýa qojalyqtarynyń, agrarlyq sharýashylyqtardyń basshylary qatysty.
Basqosýda sóz alǵan oblys ákimi Qanat Bozymbaev agroónerkásip salasyn ári qaraı damytýda oblystyń áleýeti joǵary bolǵanymen álemdegi turaqsyzdyq óz áserin tıgizip otyrǵanyn aıtty. Máselen, bıyl mıneraldy tyńaıtqysh, gerbısıd, tuqym, tehnıka jáne oǵan qajetti qosalqy bólshekterdiń baǵasy ósken, sýarmaly sý jetispeýshiligi baıqalady, sý tarıfi kóterildi jáne basqa da máseleler bar.
Aýyl sharýashylyǵy mınıstri E.Qarashókeev Memleket basshysynyń Joldaýdaǵy tapsyrmasyna sáıkes ótken jyldan bastap agroónerkásiptik keshendi sýbsıdııalaý tetigin jetildirý jumystary bastalǵanyna toqtaldy. Jalpy, osy salany qoldaýǵa bıyl 309 mlrd teńge sýbsıdııa bólindi, onyń ishinde 79,7 mlrd teńge – ósimdik sharýashylyǵyna, 100 mlrd teńge – mal sharýashylyǵyna, 8,4 mlrd teńge – ónim óńdeýge jáne 120,4 mlrd teńge qarjy quraldaryna qarastyrylyp otyr. Sondaı-aq otandyq agroónerkásiptik keshenniń ornyqtylyǵyn saqtap qalý úshin qosymsha 388,2 mlrd teńge bólinbek. Sol sııaqty buryn kúshi joıylǵan jumyrtqany sýbsıdııalaý baǵdarlamasy jalǵastyrylady, al jumyrtqa baǵytyndaǵy qus sharýashylyǵynyń barlyq sýbektisi úshin sýbsıdııalaý normatıvteri birdeı bolady jáne 2 eseden joǵarylatylady. Bul maqsatqa 7,5 mlrd teńge qarjy bólinedi. Qaraqumyq pen maıly daqyldar qunyn arzandatýǵa qosymsha 5,6 mlrd teńge qarastyrylady. Sondaı-aq Aýyl sharýashylyǵy mınıstri aldaǵy ýaqytta iri taýarly sút fermalarynyń qurylysyn jáne kókónis qoımalaryn salý men qaıta jańartýdy qarjylandyrýǵa, et baǵytyndaǵy qus fabrıkalaryn salý men jańǵyrtýǵa, jylyjaı sharýashylyqtary jelisin uıymdastyrýǵa, sýarý júıelerin jańǵyrtýǵa, tamshylatyp sýarý tehnologııalary negizinde jemis-kókónis ónimderin tıimdi óndirýdi uıymdastyrýǵa basymdyq beriletinin de aıtty.
Osy jıynda Ekologııa, geologııa jáne tabıǵı resýrstar mınıstriniń orynbasary Serik Qojanııazov ırrıgasııa júıelerin jańǵyrtý, aýyspaly egis ádisin saqtaý, sýdy únemdeý, sýdy kóp qajet etetin daqyldardyń kólemin azaıtý sııaqty sharalarǵa keńinen toqtaldy. Sonyń ishinde Almaty oblysynda atqarylǵan mundaı jumystar sýlandyrýǵa oń yqpal etýge tıis.
– Kóktemgi dala jumystaryna tehnıkanyń daıyndyǵyn, janar-jaǵarmaı, tyńaıtqysh qorlaryn jınaqtaýy kerek. Aýa raıynyń qolaısyzdyǵyna beıimdelgen joǵary sapaly tuqymmen óndiristi qamtýǵa tıispiz. Islam damý banki arqyly Eskeldi jáne Aqsý aýdandarynyń ırrıgasııalyq júıeleri qalpyna keltirilýde. Desek te ýaqtyly qarjylandyrý bolmaǵandyqtan kóptegen joba túzetýdi qajet etedi. Sý únemdeý tehnologııasy alańy bıyl 27 myń gektarǵa jetkizilýge tıis. Mal azyǵyn daıarlaý baqylaýdan tys qalmaýy kerek. Ol úshin azyqtyq daqyldardyń egis kólemin ulǵaıtyp, memlekettik orman qory, tabıǵı ulttyq parkter, jer qoryndaǵy shabyndyqtardy tıimdi paıdalaný qajet. Jalpy, agroónerkásip keshenin damytýdaǵy negizgi basymdyq ishki naryqtaǵy ımportty almastyrýǵa beriledi, – dedi Q.Bozymbaev.
Almaty oblysy