Temirtaý qalasyndaǵy mekteptiń birinde esirtki jasyryp júrgen 11-synyp oqýshysy ustaldy, dep habarlaıdy Egemen.kz.
Ustalǵan kezde 17 jastaǵy oqýshydan 40 túıir esirtki shyqqan. Bul «jyldamdyq» dep atalǵan sıntetıkalyq esirtkiniń bir túri. Ol bul oramalardy qalanyń ár bóligine kelisim boıynsha satyp alýshylar úshin jasyrmaqshy bolǵan eken.
Sonymen qatar 11 sáýirde Qaraǵandyda Gogol kóshesinde polıseıler qalanyń 20 jastaǵy turǵynyn ustady, odan aq tústi untaq tárizdi zaty bar tórt túıir tárkiledi. Tergeý kezinde ol esirtki zattary jasyrylǵan 13 jerdi kórsetken. Kúdiktiniń aıtýynsha ol bir jyl boıy esirtkini tasymaldaýshy retinde jumys jasaǵan. Sol kúni Qaraǵandy saıabaǵynan 26 jáne 30 jastaǵy taǵy eki er adam ustalǵan. Ustalǵan azamattardyń biriniń kóliginen esirtki bar alty túıir jáne ósimdik tektes zaty bar bir túıir tárkilendi.Olar qalanyń ár bóliginde ornalasqan tórt jasyryn oryndaryn kórsetken eken. Aıta keter jaıt ustalǵan eki azamattyń biri turaqty jumysy men otbasy bar salaýatty ómir saltyn ustanǵan azamat. Al ekinshisi buryn bireýdiń múlkin urlaǵany úshin shartty túrde jazaǵa tartylǵan.
«Atalǵan barlyq faktiler boıynsha QR QK 297-baby sheńberinde sotqa deıingi tergeý júrgizilýde, tıisti saraptamalar taǵaıyndaldy. Esirtki zattaryn tasymaldaý jónindegi is-áreketter ótkizý retinde saralanady jáne bul úshin 10 jyldan 20 jylǵa deıingi merzimge bas bostandyǵynan aıyrý túrindegi qylmystyq jaýapkershilik kózdelgen», dep málimdedi Oblystyq PD esirtki qylmysyna qarsy is-qımyl basqarmasynyń bastyǵy Baýyrjan Mıssalımov.
Al oqýdyń ornyna esirtkini ermek etken oqýshy oqyǵan mektepte qyzmettik tekserý bastalǵan.
Aıana Toǵanbek